25 goditje pa gol, Interit i rikthehen makthet
Frikë për zikaltrit, vetëm në shkurtin e 2022-shit kaq keq Zona “Champions” në rrezik dhe Porto në sfond trembin
Duke lënë mënjanë kampionatin fan tastik të Napolit, ai barazim i mbërritur ndaj Sampdorias është shpjegimi dhe arsyeja më e thjeshtë pse Interi nuk ka qenë kurrë në garë për titull. Zikaltrit tashmë duken një skuadër që nuk mund të qëndrojë kompetitive për shumë gjatë, pasi përveç cilësisë, që duhet të shfaqet gjithmonë, duhet të kenë edhe një tjetër karakteristikë, atë të të qëndruarit në lojë edhe në ndeshje që janë më të vështira mendërisht se fizikisht. Sfida e “Marasit” nxori edhe një herë tjetër në pah limitet dhe gjendjen aktuale të këtij Interi, që u shfaq më së miri nëpërmjet një statistike. Ndaj Sampit zikaltrit goditën 25 herë drejt portës, duke shënjestruar kuadratin me vetëm 5 prej tyre dhe duke mos arritur asnjëherë të shënonin. Hera e fundit që skuadra e Inzagit provonte kaq shumë pa gjetur golin daton një vit më parë në sfidën e shkurtit ndaj Sasuolos në kampionat (29 goditje), e dhënë që duket se ringjall fantazmat për Interin.
LUHATJET – Mungesa e golit riktheu edhe një herë mungesën e vazhdimësisë, pika e dobët e kësaj skuadre. Jo vetëm për sa u përket rezultateve, por Interi duket se ka dështuar në provimet e maturisë që kanë qenë skuadrat e vogla. Qasja ndaj tyre ka qenë e mirë, por pamundësia
për të kaluar në avantazh e ka rritur nervozizmin e milanezëve duke bërë që situata t’u rrëshqasë nga duart shumë shpesh. Një sjellje e pashpjegueshme e një ekipi të aftë për të ngritur katër trofe në tri sezonet e fundit dhe që si rrjedhim e di si fitohet.
E ARDHMJA - Në një situatë të tillë zikaltrit duhet të pyesin veten mirë pasi dy ndeshjet e radhës do të përcaktojnë shumëçka. Përballë Udinezes Interi mund të rrezikojë vendin e dytë dhe madje edhe “zonën Champions” duke parë që
tri skuadra e ndjekin me vetëm tri pikë më pak, ndërsa sfida me Porton në mesjavën e ardhshme do të jetë vendimtare për fatin e Europës. Inzagit tashmë i takon të ringjallë motivimin e skuadrës, që deri më tani ka treguar se ka një sërë limitesh.