Nga protestat e Bastonit tek i kuqi i Shkriniarit, sa pikë të lëna rrugës
Interi ka përjetuar një sezon të çuditshëm. Pasi mori veten dhe nisi të fitonte përballë rivalëve direktë të tij, habiti të gjithë duke lënë pikë me skuadra që pakkush e priste dhe të cilat në letër konsideroheshin si pikë të sigurta. Pikërisht këtu e ka origjinën edhe distanca prej 15 pikësh me Napolin, pasi ndërmjet Udinezes, Empolit, Monzës e Sampdorias, Interi ka lënë plot 10 pikë, që sot do ta kishin lejuar të ishte ende pretendent për titullin. Të gjitha këto zhgënjime kanë ama edhe një imazh zikaltër, nga shpërthimi i Bastonit për zëvendësimin në Udine te goli i anuluar i Açerbit apo kartoni i kuq i Shkriniarit.
UDINEZE-INTER 3-1 - Udineze më 18 shtator ishte në vendet e para të tabelës, me 13 pikë në gjashtë ndeshje. Por ajo e “Dacia Arena”-s ishte e pajustifikueshme për Interin. Një ndeshje që nisi me golin fillestar të Barelës dhe u përmbys më pas në një mënyrë katastrofike falë autogolit të Shkriniarit e golave të Bijol në të 85’-ën dhe Arslanit në shtesë. Mes tyre zëvendësimi i dyfishtë i Mikhitarianit e Bastonit në të 35-ën pasi ishin ndëshkuar me të verdhë që nuk u prit mirë nga mbrojtësi që reagoi duke shfryrë dhe përplasur pankinën.
MONZA-INTER 2-2 - Mallkimi janar-shkurt goditi sërish Interin, kur pas fitores me Napolin erdhi ndalesa që zbuti entuziazmin. 2-2 në Monza, në një ndeshje, ku protagonist u bë arbitri Saki, i cili vërshëlleu para kohe për një faull inekzistent, duke e zhvlerësuar golin e rregullt të Açerbit që mund të kishte ndryshuar fatin e ndeshjes kur rezultati ishte 2-1 për zikaltrit.
INTER-EMPOLI 0-1 - I njëjti skenar, me një fitore të rëndësishme si ajo e Superkupës dhe pastaj një dështim në “San Siro”-n e heshtur nga Baldanzi në të 66’-ën. Në pjesën e parë ama kishte ardhur goditja e parë me Shkriniarin që u ndëshkua me karton të kuq në minutën e 40-të, edhe pse inferioriteti numerik nuk mund të shërbejë si alibi.
SAMPDORIA-INTER 0-0 – Përsëri një derbi i fituar dhe pastaj ndalesë. Interi ngeci në një trafik që dukej i pankonsiderueshëm për ta, pasi përballë kishin një skuadër, e cila në shtëpi nuk arrinte të merrte pikë që prej gushtit, 6 muaj më parë përballë Lacios.
HUMBJET E TJERA – Përveç skuadrave të vogla, një tjetër mëkat ka pasur Interi në pjesën e parë të sezonit. Zikaltrit humbën të gjitha ndeshjet e drejtpërdrejta në fillim të sezonit, përpara se të mposhtte Atalantën më 13 nëntor dhe më pas të mposhte Napolin dhe Milanin. Në muajt e parë, Interi nuk mori asnjë pikë kundër rivalëve të tyre: nokaut kundër Lacios (31), Milanit (3-2), Romës (1-3) dhe Juventusit (2-0).