Buxheti i zvogëluar për atletikën, Gega: Ndihem e ofenduar
“Mendoj se ministrja s’ka dijeni për logjikën e ndarjes”
Publikimi i shpërn darjes së buxhetit 2023 për federatat sportive ka shkaktuar polemika të forta në komunitetin e sportit në Shqipëri. Gjithçka ka ndodhur pas kërkesës së “Panorama Sport” në drejtim të Ministrisë së Arsimit dhe Sportit për të venë në dispozicion të publikut ndarjen e lekëve të taksapaguesve shqiptarë, para të cilat shkojnë për sportin. 149.400.000 lekë të shpërndara për 17 federata, sipas kritereve të formulës së pikëzimit, që tashmë aplikohet nga ministria. Me 19 milionë lekë të rinj ishte federata e peshëngritjes më e paguara për vitin 2023, duke parakaluar basketbollin (14.8 milionë) dhe volejbollin (14.6 milionë). Por në këtë klasifikim, mbi të gjitha, tërhoqën vëmendje mundja dhe atletika, dy federatat më të suksesshme në vitin që lamë pas, të cilat morën buxhet më të ulët madje edhe se federata inferiore në rezultate si çiklizmi (13.3 milionë). Jo vetëm kaq, por atletika u vlerësua edhe më pak se taekuondoja, edhe pse 2022-shi për “mbretëreshën e sporteve” në Shqipëri ishte viti me rezultatet më të larta në histori që prej themelimit të FSHA-SË. E gjithë kjo situatë ka sjellë edhe reagime nga vetë protagonistët e sportit. Fillimisht për “Panorama Sport” u prononcua presidenti i FSHA-SË, Ferdinand Canaj, i cili kritikoi hapur ndarjen e buxhetit. Ndërsa së fundmi ka ardhur edhe reagimi i medalistes së artë dhe rekordmenes së Kampionatit Europian, Luiza Gega. Kampionia kuqezi ka shprehur zhgënjimin e saj për këtë situatë, me anë të një postimi në rrjetet sociale. Ndonëse buxheti nuk ka lidhje të drejtpërdrejtë me të si sportiste elitare, Gega thotë se ndihet e ofenduar, pasi me paraqitjet historike të bëra në
eventet më prestigjioze të atletikës, priste që federatës ku bën pjesë t’i rritej buxheti. Një mesazh me anë të të cilit Gega i bën apel edhe ministres, Evis Kushi.
REAGIMI I LUIZA GEGËS - “Sinqerisht kam përshtypjen që ministrja Evis Kushi
nuk ka dijeni për këtë logjikën e ndarjes së këtij buxheti. Shpresoj shumë që ta shikojë sa më shpejt. Personalisht si sportiste elitare nuk kam ndonjë interes sado që të jetë buxheti i federatës, por duke qenë se ai ndahet nga performanca që kanë pasur sportistët
vitin e kaluar, ndihem e ofenduar që federatës sime në vend që t’i ngrihej buxheti, i është ulur. Ndërsa disa federatave të tjera ku me gjithë respektin kur ta meritojnë...”, shkruan Luiza Gega në një postim të bërë ditën e djeshme në “Instagram”.