Superkompjuteri, Siti nuk e lëshon më vendin e parë
Shanset e “Topçinjve” bien në 34%, “Qytetarët” 62%
Shanset për titull të Ar senalit kanë rënë në 34% pas humbjes me rivalët e Mançester Sitit. “Topçinjtë” u mundën 3-1 në “Emirates” të mërkurën, çka solli zbritjen e tyre nga vendi i parë prej golavarazhit. Goli i De Bryjnes u barazua nga penalltia e Sakës. Por kampionët e Guardiolës shënuan edhe dy herë të tjera në pjesën e dytë me Grilishin dhe Halandin. Megjithatë, skuadra e Artetës ka edhe një ndeshje më shumë në dispozicion. Por sipas superkompjuterit të “Fivethirtyeight”, shanset e londinezëve për ta mbyllur në vendin e parë pas 38 javësh kanë zbritur në 34% dhe favorit për të mbrojtur titullin e tretë radhazi janë sërish “Qytetarët” me 62%. Arsenali parashikohet që ta mbyllë sezonin 2 pikë pas Sitit, në kuotën e 81 pikëve. Forma e mirë që po kalon Mançester Junajtid ka bërë që edhe shanset e tyre për titull të shtohen, pavarësisht se janë shumë të vogla krahasuar me dy vendet e para. “Djajtë” e Ten Hagut kanë vetëm 2% shans dhe parashikohet që ta mbyllin sezonin 11 pikë pas vendit të parë. Njukasëlli, i cili aktualisht në Premier Ligë renditet në vend të katërt, parashikohet që ta ruajë deri në fund këtë pozicion, ndjekur nga Brajtoni i vendit të pestë, Totenhemi i vendit të gjashtë dhe Liverpuli i shtati. “Pulëbardhat” parashikohen që ta lënë pas Totenhemin prej diferencës së golave. Asnjë shans as për Çelsin për të arritur katër vendet e
para, pavarësisht se skuadra e Graham Poterit po i afrohet vlerës së 1 miliard paundëve. Blutë e Londrës parashikohet ta mbyllin në vend të tetë, me të njëjtën kuotë pikësh sa Brentfordi i vendit të nëntë. Çelsi ka vetëm 5% shans për të arritur zonën “Champions” sezonin e ardhshëm. Në fund të klasifikimit renditen Evertoni, Bornmëthi dhe Sauthemptoni, të cilat nuk do të arrijnë që ta shmangin rënien. Që të tria këto skuadra kanë mbi 50% shanse për t’u rrëzuar në Championship, me “Shenjtorët” që kanë shanset më të mëdha, 77%.