6 lojtarë me grip, Bubeqi: 11-shja pezull
Dorian Bubeqi e ka transformuar Burrelin. Që prej ardhjes së tij në stol, nuk e njohin humbjen. Janë 7 pikë në 270 minuta, që e kanë larguar skuadrën nga zona e rrezikut. Trajneri pret vazhdimësi edhe përballë Dinamos, ndonëse “frikën” ua ka mungesave. Disa lojtarë kanë shfaqur probleme shëndetësore dhe sot do të vendoset 11-shja. Këtë kavajasi e përmend edhe për “Panorama Sport”: “Ekipi ka pasur probleme këto ditë. Kemi 6 lojtarë që kanë pasur probleme gripale dhe ende nuk e kanë marrë veten. Të paktën nuk kemi pezullime, madje këtë javë na kthehet edhe Donati Toma. Sikletin e kam vetëm te virozat dhe dëmtimet. Dy lojtarë akoma nuk kanë arritur maksimumin e vet, por mjekët po bëjnë të pamundurën. Shpresojmë që deri të dielën të kem kontingjent të plotë. Kjo po më pengon për formacionin, pasi ende nuk kam vendosur gjë. Por një gjë është e sigurt, do të luajnë ata që janë në formën më të mirë”. E cilëson të vështirë përballjen me Dinamon, por jo të pamundur. “Ndeshja me kryesuesit, do të jetë e fortë. Por ne nuk do të hyjmë si inferiorë në fushë, përkundrazi. E dimë se çfarë duam, ndaj do të tentojmë vetëm vazhdimësi. Në tri javë nuk e njohim humbjen dhe misioni është po ai. Ky kampionat është i vështirë, për vetë formulën që ka. Ne vijmë nga fitorja që morëm në Pukë, një fushë vërtetë e vështirë. Na duhet shumë. Armë sekrete nuk kemi, por jemi të bashkuar dhe gjithçka e bëjmë për një qëllim të vetëm”, theksoi 44-vjeçari. “Liri Ballabani” do të jetë i boshatisur dhe ky është meraku i vetëm i trajnerit. “Të luash në fushën tënde pa spektatorë, është si të mbetesh me 10 lojtarë. Ata janë ndihmë e madhe”, përfundoi Bubeqi. MARTIN DEDAJ