Apolonia e ka si finale, Shabani: Sot duhen 3 pikë
Në javën e fundit Apolonia humbi ndaj Turbinës dhe i kompromentoi shumë pozitat në renditje, duke qenë në zonën e rrezikut të rënies nga Kategoria e Parë. Trajneri Veljko Dovedan dhe ndihmësi i tij, Besmir Shabani, po punojnë shumë me skuadrën nga ana psikologjike. Të dielën në Fier sfidojnë Besën dhe tek Apolonia duan me patjetër të rikthehen te tri pikët. Prej kohësh skuadra ka luajtur në aneksin e stadiumit “Loni Papuçiu”, aty ku tifozët e kanë të vështirë të qëndrojnë në kushtet e duhura, por që gjithsesi e kanë mbështetur ekipin. Numri dy i pankinës, Shabani, gjatë një bisede për “Panorama Sport” është shprehur optimist për përballjen e radhës. “Përjashto ndeshjen e fundit në Cërrik, unë mendoj se dy ndeshjet e para kanë treguar një tjetër Apoloni. Edhe barazimi i marrë ndaj Korabit ishte një hap pas për ne, sepse një ndeshje më përpara mundëm Flamurtarin e vendit të dytë. Ecuria jonë ka ndryshuar, por jo plotësisht. E them, këtë pasi kjo u tregua ekzaktësisht në ndeshjen përballë Turbinës. Mirëpo, jemi vetëm në gjysmën e kampionatit dhe ka ende vend për rikuperim pikësh. Vijmë nga një humbje që djeg, sepse erdhi në një moment delikat. Renditja është aq e ngjeshur, sa me tri pikë ngjitesh në zonën ‘play off’, ndërsa një humbje të zbret në fund. Kampionati është shumë i fortë dhe çdo ndeshje është një finale më vete për të arritur objektivin sezonal. Prandaj, sfida e radhës ndaj Besës është finalja e parë për ne dhe nuk e kemi aspak luksin të humbasim pikë në shtëpi. Do të bëjmë të pamundurën që të marrim pikët e plota. Ekipi ka potencial, prandaj do të bëjmë maksimumin tonë. E kemi vlerësuar Besën dhe futemi në fushë me synime të qarta”, deklaroi zv.trajneri Shabani.