Buxheti, Llazani: Ulje spektakolare për basketbollin
“U rritet federatave me 50 sportistë, domethënëse...”
Vijojnë polemikat për mënyrën e shpërndarjes së buxhetit të sportit për vitin 2023. Pas kritikave nga federata e atletikës, një tjetër federate që i është reduktuar buxheti është edhe federata e basketbollit. FSHB-JA sheh t’i zbritet buxheti me më shumë se 30 milionë lekë të vjetër në raport me dy vitet e fundit, teksa për 2023-shin i është akorduar shuma e 148 milionë lekëve të vjetër për të përballuar aktivitetet e vitit. Në lidhje me këtë temë delikate, që ka të bëjë me shpërndarjen e parave të taksapaguesve shqiptarë, para të cilat shkojnë për sportin, është prononcuar edhe Korab Llazani, sekretar i përgjithshëm i FSHB-SË. Në deklaratën e tij për “Panorama Sport” Llazani e quan spektakolare uljen e që i është bërë buxhetit të federatës së basketbollit. “Nuk i di pretendimet e federatave të tjera, por di të them që FSHB-JA pas federatës së futbollit, ka aktivitetin më të zgjeruar. FSHB-JA ka numrin më të madh të aktiviteteve, të sportistëve të licensuar. Jemi një federatë që kemi aktivitete në harkun kohor gjatë të gjithë vitit, sepse nuk jemi sport sezonal, që t’i zhvillojmë garat me sistem grumbullimi. Kemi pjesëmarrjen më të gjerë në aktivitete me të gjitha grupmoshat, ndërsa shikojmë të na ulet buxheti me 30 milionë në mënyrën më spektakolare të mundshme. Të tjerëve u rritet buxheti, ndërsa ne na ulet”, deklaron fillimisht Llazani. Më tej, zyrtari i lartë i FSHB-SË shpreh habinë e tij për mënyrën e ndarjes së grantit dhe për mungesën e transparencës: “Falënderojmë ‘Panorama Sportin’ që pamë listën e shpërndarjes së fondit, sepse ne na ka ardhur një letër vetëm me atë që është akorduar për ne si federatë. Nuk kemi pasur asnjë njoftim apo informacion për listën e shpërndarjes për të gjitha federatat. Unë nuk e kuptoj se si mund t’i rritet buxheti një federate me 50 sportistë dhe t’i ulët një tjetre, që ka mbi 3000 sportistë. Kjo është shumë domethënëse”, thotë sekretari i FSHB-SË, i cili në fund e mbyll me kritika ndaj ministrisë, që ndryshe nga Kosova nuk ka një strategji për zhvillimin e sportit: “Nuk na ka
pyetur askush se sa buxhet na duhet. Nuk na kanë mbledhur asnjëherë për të dëgjuar se cilat janë nevojat që ka Federata Shqiptare e Basketbollit. Nuk na kanë përgëzuar asnjëherë për gjithë këtë numër të lartë aktivitetesh kombëtare dhe
ndërkombëtare që kemi bërë gjatë vitit. Duhet të shohim nga Kosova, që bën mbledhje për hartimin e strategjisë kombëtare të zhvillimit të sportit. Ndërsa këtu me sa duket nuk e shohin të udhës”, përfundon prononcimin e tij Llazani.