Çelsi harron të shënojë, Poter: Nuk është fat

Trajneri i Çelsit, Graham Poter, refuzoi që të fajësonte fatin e keq të skuadrës së tij përpara porte, për problemin e golave. Blutë e Londrës kanë shënuar vetëm 2 gola në 5 ndeshjet e tyre të fundit dhe vijnë në ndeshjen e sotme me Sauthemptonin pas humbjes 1-0 me Dortmundin në Champions. Vetëm Kristal Palasi në 12 skuadrat e para të Premier Ligës ka shënuar më pak gola sesa ekipi i Poterit, që ka mbyllur 7 ndeshje pa shënuar në 12 të fundit. Mbi 325 milionë paund u shpenzuan nga blutë e Londrës në merakton e janarit për transferimin e 8 lojtarëve. “Ne mund të bëjmë gjithnjë më shumë dhe më mirë. Por në të njëjtën kohë, ne duhet të shohim situatën siç është në të vërtetë. Nuk më pëlqen që të përdor fjalën fat që nuk po shënojmë. Është diçka që ti nuk mund ta kontrollosh. Sfida për ne është që lojtarët cilësorë që kemi në pozicionet finale, të mund ta na shënojnë”, tha tekniku anglez.

TIAGO SILVA – Ndërkohë që qendërmbrojtësi i Çelsit, Tiago Silva, sulmoi mediat braziliane për talljet që iu bënë Enzo Fernandezit, pas driblimit nga Adejemi në ndeshjen me Dortmundin. Mediat shkruanin se mesfushori argjentinas, i cili u bë blerja më e shtrenjtë në historinë e futbollit anglez këtë sezon, ka nevojë për një taksi. Në një postim në “Instagram” të medias “TNT”, ku ironizohej lojtari më i mirë i ri i Botërorit, qendërmbrojtësi brazilian shkruante: “Po tregoni një mungesë totale respekti. Bëhuni më seriozë me punën tuaj”. Çelsi pagoi 107 milionë paund për transferimin e Enzos nga Benfika në ditën e fundit të merkatos. Fernandez firmosi një kontratë 8.5-vjeçare në “Stamford Bridge”, duke u bërë blerja e tetë e pronarit Tod Bohli në muajin janar.