Zgjohet Partizani, çmonton Erzenin me dhjetë lojtarë

Shijakasit kaotikë, “demat” u shënojnë tre gola për tri pikë

Partizani më në fund arrin të fitojë me një lojë bindëse dhe e bën këtë në mënyrë “heroike” me mbi 90 minuta me një lojtar më pak ndaj një kundërshtari si Erzeni, që ra në “grackën” e numrave në fushë dhe nuk arriti të dhurojë lojën e zakonshme, teksa as përshëndetja në distancë nga Zaneti nuk i bëri punë shijakasve. Në fund “demat” fitojnë 3-0 dhe kthehen pretendentë për titullin. “Raketa” e Rrapajt dhe golat e Da Silvës e Hotit vendosën fatin e tri pikëve.

PJESA E PARË – Ndeshja nis menjëherë me karton të kuq. Pas vetëm 49 sekondash lojë, Maget Gueje ndërhyn me takë në këmbën e Kadriut. Kryesori Alla akordon thjesht një faull, por Jorgji në VAR e sinjalizon se ka dyshime për përjashtim. Më pas arbitri lushnjar shkon ta shohë vetë dhe rikthehet në fushë me kartonin e kuq në dorë, duke lënë Partizanin me një lojtar më pak, vetëm pak çaste pas startit të ndeshjes. Projeksionet në këtë moment flisnin për një dominim të Erzenit për shkak se kishin një lojtar më shumë, por nuk ndodh kështu. Loja është e barabartë në pjesën e parë, teksa goditja e parë në portë vjen vetëm në minutën e 32-të me Nonaton, që gjithsesi nuk e vë seriozisht në provë Rexhepin. Pas shtatë minutash Mba ka një rast të artë, kur merr një kros nga Rrapaj, por në zonën e vogël nuk arrin të shënjestrojë portën dhe godet mbi traversë. Më pas, në minutën e parë shtesë, Partizani fiton një goditje dënimi nga rreth 20 metra distancë. Da Silva niset dhe lëviz pak topin sa për të çekuilibruar murin, teksa Rrapaj lëshon një goditje të pakapshme nga Xhika, duke i dhënë avantazhin Partizanit dhe i çuar skuadrat në tunel me avantazhin e vendësve.

PJESA E DYTË – Nëse e para nisi me një të kuq në disfavor të tyre, pjesa e dytë nis në mënyrën më të mirë për Partizanin, pasi pa u mbushur një minutë lojë gjen golin e dytë. Është Mba, që merr para me forcë mbrojtësit e Erzenit dhe pason për Da Silvan në zonë, i cili i markuar keq nga Krasniqi, nuk e ka aspak të vështirë të godasë saktë pak metra nga porta dhe të festojë golin e dytë për “demat”. Në minutën e 51të Erzeni përgjigjet me një rast shumë të mirë me Krasniqin, që devijon një kros të hedhur në zonë, por Rexhepi zgjatet bukur dhe eviton golin e shijakasve.

Pas vetëm gjashtë minutash, Hadroj depërton në qendër të zonës mes shijakasve, por gabon në momentin e fundit dhe del jashtë kufizimeve të fushës, pa pasuar për shokët ose sulmuar portën. Më pas, në të 69-ën, Rexhepi bën një dalje të studiuar jo mirë

dhe nuk arrin të kontrollojë sferën si duhet në një zonë të rrezikshme, por fatmirësisht krosi kalon gjithë perimetrin anësor të fushës dhe përfundon në rivënie anësore. Pa u mbushur 71 minuta vjen edhe goli i tretë i “demave”. Insistim i gjatë në zonën kundërshtare,

aty ku shijakasit nuk spastrojnë, por humbin topin. Në fund sfera shkon te Hoti, i cili nuk e ka të vështirë ta postojë në rrjetë. Shijakasit, që u dukën të dorëzuar që pas golit të parë, nuk bëjnë asgjë në këto minuta dhe sfida mbyllet me shifrat 3-0.