Hoti: Besuam pas të kuqit, në janar na ikën dy “karagjozë”

Engjëll Hoti ishte autori i golit të tretë, që vulosi dhe fitoren e Partizanit ndaj Erzenit. Pas sfidës, mesfushori u shpreh se ishte shumë i kënaqur me golin, por më shumë për tri pikët e marra. Ai nuk i kursen batutat për Skukën dhe Bitrin, që sipas kosovarit ishin të rëndësishëm në lojë dhe i jepnin skuadrës atmosferë pozitive edhe jashtë fushës së blertë.

KARTONI - “Jemi shumë të kënaqur, sepse ishte ndeshje shumë e rëndësishme për tri pikët. Unë mundohem të jap maksimumin në çdo ndeshje dhe nëse shënoj sa më shumë, jam edhe më i lumtur. Nuk e pashë mirë rastin e kartonit të kuq, ndoshta mund të jepej dhe kartoni i verdhë dhe të vazhdonte lojën, pasi ishte në fillim”.

NDESHJA - “Kisha shumë besim që nuk do të humbnim dhe kur shënuam golin e parë dhe të dytë e dinim që nuk do të ndaleshim. Kolela na mbron brenda dhe jashtë fushës. Kemi ekip të mirë, por pas rezultateve të fundit që nuk kanë qenë të mira, ka dashur të na qetësojë. E rëndësishme është të fitojmë ndeshje pas ndeshjeje. Kampionati është ende i gjatë dhe kemi shumë pikë për të marrë”.

NDRYSHIMET – “Kanë ikur dy lojtarë të rëndësishëm, brenda fushës, por dhe dy ‘karagjozë’ jashtë saj. Por kemi marrë edhe futbollistë me potencial. Kemi lojtarë të rinj, por dhe me eksperiencë, duhet t’i marrim ndeshjet me radhë. Të premten e kemi me Kukësin dhe do të vazhdojmë kështu. Mba është shumë lojtar i mirë, duhet ende të përshtatet. Selmani dhe Bilali janë gjithashtu shumë të mirë, me shumë potencial, që na ndihmojnë shumë. Trajneri do të bëjë më shumë rrotacione me këta lojtarë”, u shpreh Hoti për “Oversport”.