Bylisi fantastik, Laçi “fik” motorët
Bylisi merr 3 pikë të çmuara në Laç dhe bën kthesën pas dy humbjeve ndaj Teutës dhe Partizanit, e në këtë mënyrë ballshiotët rrisin shanset për mbijetesë. Një gol i talentit të Bylisit, Flamur Ruçi, ka zgjidhur ndeshjen. Takimi nisi me një ritëm të lartë nga të dyja skuadrat, të cilat shpërdoruan disa raste të pastra për shënim. Si Laçi dhe Bylisi mund ta zgjidhnin sfidën që në pjesën e parë, por duket se në këtë duel fitoi eksperienca e skuadrës mike, që u tregua pragmatiste dhe luftoi fort deri në fund.
PJESA E PARË
Laçi dhe Bylisi hedhin në fushë më të mirët, si për të treguar se kërkojnë maksimumin në këtë sfidë. Ballshiotët japin shkëndijën e parë me Filipe Souzën, e më pas me Eskuerdinjën, por Bylisi duket se këtë sezon e ka edhe një “armik” të betuar, golin! Ballshiotët edhe pse krijojnë raste të volitshme, nuk shënojnë. Ndërkohë që Laçi është mjaft i rrezikshëm, sidomos me Shkurtajn e Guindon, por edhe me lojtarët nga pas tyre, siç janë Ziko, Manellari, apo Barjamaj e Ujka. Madje kurbinasit kanë edhe një rast të pastër me Guindon, por Teqja nuk ka lejuar prekjen e rrjetës. Ashtu si dhe Selmani, që 5 minuta nga fundi bën mrekullinë, ndërsa ka një mundësi edhe Lajthia, që duket se e ka harruar golin edhe ky. Një pjesë e parë me lojë të hapur, ku Laçi dhe Bylisi ishin agresivë në luftën për topin e parë, por rastet ideale për shënim i kanë pasur miqtë nga Ballshi.
PJESA E DYTË
Si Mezani ashtu edhe Shensoi e nisën fraksionin e dytë me të njëjtët lojtarë si në pjesën e parë. Për t’u theksuar se pjesa e dytë foli si fillim vetëm për ballshiotët, të cilët gjetën golin me Ruçin në minutën e 54’-t. Ndërkohë që të dy trajnerët bëjnë edhe ndërrime, ku Mezani kërkon barazimin me ngulm, ndërsa Bylisi ruajtjen e fitores, por edhe golin e dytë, duke e tentuar atë me Lajthinë, Kaçorrin e Filipe Souzën. Më pas mallakastriotët u kujdesën për të ruajtur rezultatin, duke mos i lënë shumë hapësira kurbinasve, që nuk reshtën së kërkuari golin e barazimit, madje duke sulmuar me forca të shumta, por edhe me goditjet nga distanca. Koha e rregullt dhe 6 minutat shtesë përfundojnë. Takimi përfundoi 0-1 për Bylisin, me festën e mallakastriotëve dhe dëshpërimin e kurbinasve... Kështu Bylisi largohet për momentin nga zona e ftohtë e mbijetesës, duke shkuar në vendin e 7të me 26 pikë, ndërsa Laçi lëshon akoma dhe më shumë terren në garën për në Europë, duke qëndruar në vendin e 6-të me 29 pikë dhe tashmë rrezikon sërish të bëhet pjesë e garës për mbijetesë.