Apolonia harron të fitojë, Besa i fut “ethet” e rënies
Raste dhe traversa, skuadrat ndajnë pikët
Apolonia nuk po ngre dot kokë. E treta javë me radhë që fierakët nuk fitojnë dhe kjo ecuri i ka “stampuar” në zonën e ftohtë. Përballë Besës nuk pati fitues dhe as gola në stadiumin “Loni Papuçiu”. Pika u shkoi për shtat vetëm miqve, pasi vendësve veçse u shtohen “ethet” e rënies. NDESHJA - Takimi ka nisur i qetë nga të dyja skuadrat, me fierakët që e qarkullojnë disi më dendur topin. Vetëm në minutën e 10-të do të rrezikojnë seriozisht portën. Maksuti depërton me shpejtësi në zonë dhe gjuan. Dobjani është në vështirësi, por në ndihmë i vjen Ramilli. Besa do të bënte gjuajtjen e parë në të 25-ën. Aksion perfekt nga treshja sulmuese Ntepeonuh-hoxha, me këtë të fundit që ka topin në zotërim dhe shmang bukur mbrojtësin Izrael. Brenda 16 metrave gjuan fort me të djathtën në cepin e portës, me Bushin që bën shpëtimtarin me njërën dorë. Përgjigjen vendësit me Asllanajn në të 34-ën, që gjen vetëm rrjetë e jashtme. Minutat e mbetura të kësaj pjese nuk sollën asgjë të re. Apolonia ishte disi më e qartë, por kjo nuk i mjaftoi për të gjetur golin. Nga ana tjetër, Besa e vendosur mirë në fushë, nuk lë aspak hapësirë në prapavijë dhe duket se ky barazim i shkon për shtat. Pas pushimit, verdhezinjtë janë më kërkues. Ntepe kroson direkt një top në shtyllën e parë, ku gjendej Onuh. Devijon lehtë topin sulmuesi, por bllokohet me trup nga portieri. Rasti perfekt ishte ai të 57-ën, kur Apolonia “flirtoi”
me avantazhin. Hebeja ekzekuton një goditje dënimi nga 25 metra dhe e çon topin aty ku ishte Umejiego. Sulmuesi gjuan fort me kokë, por topi përfundon në traversë e më pas del jashtë. Veriu marrin përsipër një kundërsulm të shpejtë çerek ore para fundit, duke gjetur të papërgatitur
mbrojtjen vendëse. Driblon me lehtësi Ndubuisi, më pas depërton me shpejtësi në zonë, por ndalet nga Repaj. Kavajasit pretendojnë për 11-metërsh, por ka vetëm faull jashtë zone, që nuk “ndrit” asgjë. Pesë minuta para fundit, sërish Besa e rrezikshme, por pa gjetur dot rrugën e rr
jetës. Hoxha dëshiron të surprizojë nga rreth 40 metra portierin, i cili pati lënë zonën, por topi përfundon jashtë dhe kaq mjaftoi për këtë sfidë. Skuadrat ndajnë pikët në stadiumin “Loni Papuçiu”. Besa është më e kënaqur, ndërsa Apolonia zhytet edhe më keq në krizë.