Robinson, Çela dhe Aida Palko shpallen më të mirët e javës
Basketbolli shqiptar zhvilloi fundjavën e kaluar takimet e radhës, të vlefshme për kampionatet kombëtare, te meshkujt dhe femrat. Si zakonisht, duke iu referuar statistikave, Federata Shqiptare e Basketbollit ka shpallur lojtarët dhe formacionet më të mira të javës. Në Superligën e meshkujve vlerësimi MVP shkoi edhe një herë tjetër për Jordan Robinson të Besëlidhjes. Amerikani bëri diferencën edhe në fitoren kundër Vllaznisë, duke qenë pikë referimi për lezhjanët, teksa e mbylli takimin me 26 pikë, 6 ribaunde dhe 4 asiste, duke shënuar indeksin 37. Për sa i përket “top-5” si gjithnjë i pranishëm është Endrit Hysenagolli,
autor i dopietës së radhës dyshifrore me 17 pikë e 24 ribaunde, por pa mundur që t’i japë suksesin ekipit të tij kundër Kamzës. Gjithashtu një tjetër bardheblu në formacionin më të mirë është edhe Julian Hamati, protagonist me 30 pikë, 13 ribaunde dhe 3 asiste. Në formacionin “top” ka vend edhe për dy amerikanët e Kamzës, Xenader Bowers (12 pikë, 16 ribaunde, 6 asiste) dhe Justin Thomas (32 pikë, 10 ribaunde), të dy vendimtarë në suksesin e skuadrës së tyre kundër Tiranës. Në Kategorinë e Parë, çmimi MVP është fituar nga Alban Çela i Elbasanit, i cili bëri një ndeshje të shkëlqyer kundër Flamurtarit, edhe pse nuk mundi t’i jepte fitoren ekipit të tij. Çela regjistroi 30 pikë, 6 ribaunde dhe 1 asist, për të shënuar indeksin 31. Formacioni më i mirë më tej plotësohet nga Abdel Gjyzeli i Partizanit, Eraldo Kollovi dhe Marsel Sotiri nga Flamurtari, si dhe nga Sotiraq Bello i Skënderbeut. Duke kaluar te Kategoria e Parë e femrave, spikat forma e jashtëzakonshme e Aida Palkos. Basketbollistja gjirokastrite e Tiranës është si vera, duke mos e ndier aspak peshën e viteve, përkundrazi, po shfaq një nivel për t’u admiruar. Me 12 pikë, 16 ribaunde dhe 3 asiste me indeksin 31, të regjistruara në triumfin në derbin kundër Partizanit, Palko bëri të sajin vlerësimin MVP. Në pesëshen e më të mirave bëjnë pjesë edhe dy lojtaret e Flamurtarit, Sophija Jacobson dhe Liliane Ndongbwo, së bashku me Bernarda Rreshpjën e Vllaznisë si dhe Marsida Shimën e Studentit.