Klop: Torturë të shihja Liverpul-real, duhen 2 superndeshje
“Ançeloti, trajneri më i qetë dhe njerëzor që kam takuar”
Jyrgen Klop thotë se ka përjetuar torturën e rishikimit të finales së sezonit të shkuar të Champions-it kundër Realit për herë të parë përpara duelit të sotëm në 1/8-at kundër gjigantëve spanjollë në “Anfield Road”. Tekniku gjerman tha në konferencën për shtyp se skuadrës së tij i duhen dy ndeshje perfekte kundër skuadrës që i ka shkaktuar shumë zhgënjime atij në 5 vitet e fundit, për të siguruar biletën në çerekfinale. Reali e mundi Liverpulin në finalen e Kievit në vitin 2018 dhe e përsëriti një gjë të tillë edhe në finalen e sezonit të shkuar në Paris, ku një gol i Viniciusit bëri diferencën. Klop do të kishte qenë i lumtur sikur të mos kishte parë asnjë sekondë për atë që ndodhi majin e shkuar në Paris. “Gjëja që unë kuptova menjëherë tani është përse nuk e kam parë finalen në ritransmetim. Ishte një torturë e vërtetë, sepse ne luajtëm një ndeshje të mirë dhe mund të kishim fituar, por ata shënuan dhe ne nuk e bëmë. Ne pamë se sa me përvojë është Reali dhe se sa pak ata nervozohen nga fati që skuadrat e tjera kanë shanse. Ata nuk e humbasin vetëbesimin në një sekondë. E dinë që ‘do të vijë shansi ynë’ dhe mbrojnë me jetë. Kjo është diçka që duhet mësuar prej tyre, pa dyshim”. Përveç dy finaleve të humbura, Reali i eliminoi 3-1 edhe në çerekfinalet
e 2021-shit. “Dikush më tha pas finales, por nuk e di nëse është e vërtetë se Karlo tha se Liverpuli e dinte shumë mirë se me çfarë do të përballej. E ripashë ndeshjen, duke ditur ekzaktësisht atë që ne do të bëjmë dhe ne duhet ta fitonim atë ndeshje. Ne nuk e bëmë dhe një arsye ishte përse nuk shënuam, por ne duhet ta kishim fituar me rastet që krijuam. Por Karlo është trajneri më i qetë që
unë kam takuar në jetën time, një prej njerëzve më të mirë që mund të takosh: një njeri fantastik, i përulur, super i zgjuar dhe i këndshëm. Mënyra njerëzore e menaxhimit të tij është tërësisht në një tjetër nivel nga çdokush. Unë e admiroj shumë. Unë pres që ‘Anfield’ të jetë gati për gjithçka. Njerëzit janë të lumtur që na kanë parë në një formë më të mirë në dy ndeshjet e fundit dhe le të provojmë
sërish. Shpresojmë që këto dy rezultate të na ndihmojnë që të vijojmë të bëjmë një superndeshje, në fakt duhet të luajmë dy superndeshje për t’u kualifikuar. Unë nuk kam problem me këtë, sepse nëse nuk luan në mënyrën më të mirë ti nuk ke asnjë shans. Realit nuk i duhet të bëjë ndeshjen më të mirë për të pasur një shans. Kjo është diferenca. Është një duel goxha special dhe unë mezi po e pres”.