Sokol Gosa: Ja pse Egnatia luan më mirë jashtë fushës
Pas Hasan Zylës, një emër simbol në futbollin rrogozhinas, që ka qenë në elitë pjesë e Besës së Kavajës, është pikërisht Sokol Gosa. Bëhet fjalë për një rrogozhinas puro, që konsiderohet një tjetër ikonë me kontribute të jashtëzakonshme tek Egnatia e mbi dy dekadave më parë. Si një ish-futbollist, kapiten i skuadrës ndër vite, por edhe ish-trajner dhe drejtues në klub, Gosa vazhdon të jetë afër Egnatias. Sot për Sokolin është një ditë e veçantë, pasi feston edhe 53-vjetorin e lindjes, ndërsa foli për “Panorama Sport” rreth situatës në skuadër. Ai gjeti rastin për të bërë sugjerimet e tij si specialist futbolli, duke prekur edhe çështjet më të nxehta rreth klubit.
Nga fitorja me Laçin, te barazimi me Vllazninë. Si i keni parë rezultatet e Egnatias në dy javët e fundit?
Shoh një ecuri pozitive, jo vetëm në rezultate, por edhe në lojën e bukur dhe me raste shënimi që po bën skuadra, sidomos në takimin e fundit ndaj Vllaznisë. Ndonëse nuk shënuam dhe as nuk fituam, mendoj se skuadra ka bërë një ndeshje të mirë.
U bënë më shumë se tre muaj që Egnatia nuk fiton në shtëpi. Përse po ndodh kjo sipas jush?
Ndeshjet brenda çuditërisht janë bërë si mallkim për Egnatian. Por, të mos harrojmë se në transferta ka pasur rezultate më të mira, sepse ndoshta ka më pak presion jashtë Rrogozhinës. Në fushën tonë, ndoshta nga dëshira e madhe për të kënaqur tifozët, por edhe për të qenë pranë përmbushjes së objektivave, ka bërë që lojtarët të mos gjejnë qetësinë e duhur, veçanërisht në rastet që kanë pasur për shënim. Kam besim se kjo situatë do të kalojë shpejt dhe nuk do të zgjasë shumë.
Ngjeshja e skuadrave në renditje dhe presioni i pikëve në raport me objektivat që ka klubi, sa mund të ndikojë në vazhdimësinë e ekipit?
Ekipin e shoh shumë të motivuar në seancat stërvitore dhe mbi të gjitha ka mbështetjen maksimale nga presidenca. Kjo ngjeshje e skuadrave, sidomos pesëshja e parë, mendoj se do të jetë deri në javët e fundit të kampionatit. Pastaj llogaritë do të bëhen në fund.
Të premten ekipi luan në transfertë ndaj një Bylisi që vjen pas fitores në Laç. Çfarë ndeshjeje prisni?
Transferta e Ballshit është delikate dhe do të vendosë shumë për Egnatian. Duhet patjetër vazhdimësi dhe kam besim se trajneri Tetova, bashkë me stafin e tij, e kanë gjetur modulin për të marrë maksimumin nga disa lojtarë që nuk janë akoma brenda potencialit të tyre. Egnatia ka shumë kualitete në të gjitha repartet dhe është një skuadër me një bosht cilësor. Dua të përgëzoj Malotën, që është rikthyer në prapavijë me cilësinë e liderit. Ai është një shembull si brenda fushës dhe jashtë saj, kështu që duhet të frymëzojnë edhe lojtarët e tjerë më të rinj. Ekipit i mjafton të luajë me kujdes dhe përqendrim maksimal, duke shfrytëzuar çdo shans për ta goditur Bylisin.
Duke qenë se klubi nuk ka eksperiencë të madhe në krahasim me rivalët për objektiva madhorë, sa impakt mund të ketë kjo në menaxhimin e situatave?
Egnatia përfaqëson një qytet të vogël si Rrogozhina, që i ka bërë tashmë të gjithë krenarë dhe e ka zvogëluar ndjeshëm emrin si e ashtuquajtur skuadër e vogël. Tashmë është e barabartë mes të barabartëve. Me lojërat që po zhvillon Egnatia, mënyrën se si klubi po kërkon të përshtatë gjithçka në të mirë të ekipit dhe investimet e presidentit Agim Demrozi, e bëjnë Egnatian solide në çdo aspekt. FATMIR EFICA