Ten Hag darkon me Fergin përpara Barçës: Konsultë nga përvoja e tij
Holandezi merr këshillat nga menaxheri legjendar
Erik ten Hag ka darkuar me Sër Aleks Fergusonin përpara përballjes së sotme me Barcelonën në Ligën e Europës. Ish-trajneri legjendar i “Djajve” dhe tekniku aktual u fotografuan në restorantin “Cibo” në Mançester përpara ndeshjes së kthimit të “play off”-it të 1/8-ave me katalanasit. 81-vjeçari humbi dy finale të Champions-it kundër Barçës në 2009 dhe 2011, por shijoi gjithashtu dy fitore të famshme në finalen e Kupës së Kupave në 1991-shin dhe gjysmëfinalen e Champions-it në 2008. Junajtid barazoi gjithashtu 3-3 në të dyja ndeshjet me Barcelonën në grup në sezonin e tripletës në 1999. I pyetur në konferencën e djeshme për shtyp në “Carrington” për takimin e tij me Sër Aleks, Ten Hag tha se ai i mirëpriti këshillat e trajnerit legjendar: “Ishte fantastike. Unë e shijoj gjithnjë të flas me njerëz që kanë shumë dije dhe shumë eksperiencë. Ai do ta ndajë atë, dëshiron që të ndihmojë dhe mbështesë. Mançester Junajtidi është klubi i tij dhe ai ndihet kaq i përkushtuar. Ne po luajmë mirë. Ishte një mbrëmje e shkëlqyer dhe mezi po pres takimin e radhës me të”. Holandezi përshëndeti tifozët pas fitores kundër Lestërit të dielën dhe paralajmëroi një mbrëmje magjike sot në “Old Trafford”, ku “Djajtë” do të kenë shansin që të sigurojnë një biletë në 1/8-at pas barazimit 2-2 në “Camp Nou” javën e shkuar. Ky është dueli më i rëndësishëm europian për të që prej gjysmëfinales së Champions-it në 2019 në stolin e Ajaksit, por Ten Hag tha: “Për mua ndeshja e radhës është gjithnjë më e rëndësishmja. Unë nuk jam nga ata tipa që kthej kokën pas, por shoh përpara. Jam i emocionuar për nesër (sot). Dy skuadra të shkëlqyera do të përballen me njëra-tjetrën në ‘Old Trafford’. Një atmosferë e shkëlqyer, një ambient fantastik, është më e mira që mund të marrësh”. Mançester Junajtid është ende në luftë në të katërta frontet që në sezonin e parë të ish-trajnerit të Ajaksit në “Old Trafford”. Ata mund të fitojnë trofeun e parë që prej vitit 2017, të dielën, ku do të përballen në finalen e Kupës së Ligës kundër Njukasëllit.