Agim Canaj: Decizive transfertat, Dinamo u fut vetë në stres

“Blutë kanë më shumë shanse, më pas vjen Flamurtari”

Agim Canaj është një njohës i mirë i kampionatit të Kategorisë së Parë, teksa jo më larg se viti i kaluar shpëtoi Lushnjën nga rënia në një sezon shumë të vështirë. “Normalisht e kam ndjekur kampionatin me shumë kuriozitet këtë sezon. Kam parë disa ndeshje, kryesisht të Dinamos, Skënderbeut dhe Flamurtarit. Së fundmi kam qenë në stadiumin e Orikumit, kur luante Dinamo. Gjithashtu kam parë ndeshje të Besës dhe Korabit. Kam informacionin e duhur për çdo skuadër që pretendon ngjitjen në Superiore. Fillimi i këtij sezoni krijoi përshtypjen se dy klube do të ishin të ngjitura pa diskutim: Dinamo dhe Flamurtari. Më pas u ngrit Skënderbeu me rezultate. Kjo erdhi për meritë të trajnerit të ri, Gvozdenoviç dhe ndryshimeve që u bënë në afrimin e disa lojtarëve cilësorë. Skënderbeu u bë pretendent dhe u ngjit në podium shumë shpejt, falë edhe lëvizjeve të një presidenti me shumë eksperiencë si Takaj”, është shprehur fillimisht trajneri që ka drejtuar Dinamon, Vllazninë, Skënderbeun, Besën, Lushnjën etj.

“BLUTË U VETËKËNAQËN”

Por si e shikon Canaj ecurinë e Dinamos kryesuese dhe luhatjet e fundit. “Është skuadra e zemrës sime, por me atë që unë po shikoj, e ka vuajtur shumë rënien nga Superiorja. Ajo situatë e keqe ka lënë gjurmë, pavarësisht se investimet ishin të mëdha. Nga diferenca e madhe me 7 pikë, Dinamo u fut papritur në presionin e ngjitjes dhe rivalët iu afruan shumë. Mendoj se kjo rënie e skuadrës ka ndodhur për dy arsye. Së pari, mund të jetë një vetëkënaqësi e klubit dhe së dyti mund të ketë diçka që nuk shkon në ekip pas barazimit me Skënderbeun dhe humbjes së fundit në Burrel. Këto e kanë tensionuar skuadrën. Mirëpo, Dinamo ka shumë elementë cilësorë dhe bashkë me Flamurtarin dhe Skënderbeun, do të luftojnë deri në fund për dy vendet e para”, ka thënë vlonjati në prononcimin për “Panorama Sport”.

“TRANSFERTAT JANË VENDIMTARE”

Trajneri 60-vjeçar i jap shanse më të mëdha Dinamos për ngjitjen, por thekson se transfertat do të jenë vendimtare për të tria ekipet pre

tendente. “Unë mendoj se të tria këto klube do të influencohen më shumë nga ndeshjet që do të kenë në transfertë. Kategoria e Parë është shumë e vështirë kur luan jashtë fushës tënde, duke ditur që gjashtë skuadra rrezikojnë për të dalë nga kategoria. Diferencat nuk janë të mëdha, kështu që nëse Dinamo u mund në Burrel, e njëjta gjë mund të ndodhë me Skënderbeun dhe Flamurtarin në vijim. Çdo pikë që lihet kthehet në vështirësi. Nëse flasim me përqindje apo shanse, personalisht mendoj se Dinamo ka një përqindje më të madhe për t’u futur në Superiore, ndërsa më pas vijnë Flamurtari dhe Skënderbeu. Kjo do të jetë distanca, por pastaj se kush mund të futet direkt, është ai që do të gabojë më pak jashtë fushe. Në ndeshjet që këto ekipe luajnë në shtëpi, Dinamo, Flamurtari dhe Skënderbeu do të jenë shumë efektive dhe nuk besojnë të gabojnë”, përfundoi Canaj analizën për kampionatin.