Pepa: Fitojmë me Apoloninë, Dalipi na i ka treguar mangësitë
LUSHNJA/ Nga derbi te shpëtimi, flet sulmuesi
Lushnja kërkon që të shfrytëzojë momentin. Janë vërtetë në zonën e rënies, por vijnë në derbi me një seri rezultatesh pozitive. Janë 270 minuta pa humbje, mes një fitoreje në shtëpi dhe dy barazimeve në transfertë. E gjithë kjo situatë ka çuar në majë entuziazmin në radhët e skuadrës së drejtuar nga Klevis Dalipi. Brunild Pepa sheh vetëm fitore përballë Apolonisë, ndonëse kërkon kujdes maksimal. Golashënuesi më i mirë i verdhejeshilëve, për gazetën “Panorama Sport”, thotë: “Atmosfera është optimale. Kemi entuziazëm falë rezultateve pozitive. Shpresoj që me Apoloninë
të jemi akoma më seriozë dhe me këmbë në tokë. Të arrijmë qëllimin që kemi, për ndeshjen e radhës. E kemi të domosdoshme këtë fitore. Duhet të jemi të qetë nga kjo pjesë. Secili duhet të bëjë punën e vet dhe të japë maksimumin, për të fituar ndeshjen”. Autori i 6 golave mendon se një trepikësh duhet ta marrin për tifozët, ndërsa mendon se kanë një “bonus” shumë të madh përballë kundërshtarit. “Unë, i gjithë ekipi, stafi, drejtuesit, jemi shumë optimistë, që Lushnja do të shpëtojë në fund të sezonit. Por, që duhet të jemi me këmbë në tokë. T’i marrim ndeshjet një nga një. Besoj se do të bëjmë një pjesë të dytë të sezonit shumë të
mirë. Të kënaqim tifozët që na mbështesin. Futbolli luhet për të kënaqur ata. Besoj që do të bëjmë mirë dhe në fund do të shpëtojmë. Dalipi na ka futur një frymë fituese. Trajneri ynë e njeh shumë mirë ekipin e Apolonisë. I kemi këshillat e duhura, për mangësitë e kundërshtarit. Besoj se ne do t’i shfrytëzojmë ato. Shpresoj se do të marrim
rezultatin pozitiv, të cilin duam dhe të jemi të gjithë të kënaqur”, tha 32-vjeçari, që komentoi edhe zhbllokimin e sulmit. Pepa dhe Canka kanë shënuar 11 gola deri më tani, duke zgjuar shpresa të mëdha. “E rëndësishme është që sulmi ynë po funksionon. Kemi funksionuar edhe më parë, por rezultati është më i rëndësishëm
se golat e mi dhe të Mikelit. Shpresoj, që golat tanë t’i japin fitoren ekipit. Por, siç e thashë edhe më parë, secili të bëjë punën e vet dhe rezultati do të vijë. Kushdo që shënon. E mira është që sulmuesit të shënojnë, sepse për atë punë janë. Në këtë këndvështrim besoj se nuk do të ndalemi”, përfundoi “bomberi”.