Benzema shkruan historinë, vetëm Leo si ai
Golin e parë e shënoi me Lionin kundër Rozenborgut
Ishte 6 dhjetori i vitit 2005, kur një djalosh i ri i quajtur Karim Benzema debutonte në Ligën e Kampioneve me fanellën e Lionit. Bashkë me debutimin shënonte dhe golin e tij të parë në Champions kundër Rozenborgut. Ajo ishte e para dhe e vetmja ndeshje e tij në atë sezon në këtë kompeticion. Por ishte shkëndija e një flake të gjatë që vazhdon prej 18 vitesh radhazi. Ishte pikënisja e një aventure që e ka kthyer sot në një nga sulmuesit më të rëndësishëm në historinë e Ligës së Kampioneve. Që nga ai gol me Lionin, për 18 sezone radhazi në kompeticionin më elitar në Europë në nivel klubesh, Benzema nuk ka munguar asnjëherë në apel. Ky sezon dukej i habitshëm, duke parë që emri i tij nuk figuronte në listën e golashënuesve të kompeticionit. Ishte vetëm çështje kohe. Pasi nuk kishte mundur të shënonte asnjë rrjetë në fazën në grupe, ai është kthyer i zakonshmi atëherë kur duhet, ku Liga e Kampioneve bëhet serioze. Ka zgjedhur një stadium mitik në Europë si “Anfield”
për ta bërë sefte në këtë edicion të Champions-it dhe e ka bërë me stil, me dy gola që e kanë ngjitur mes të tjerash dhe në vendin e tretë në listën e golashënuesve historikë të kompeticionit pas Kristiano Ronaldos dhe Lionel Mesit. Bashkë me dy golat e shënuar
kundër Liverpulit, Benzema është bërë i vetmi lojtar së bashku me “Pleshtin” e PSGSË që shënon në 18 sezone radhazi në Ligën e Kampioneve. Leo Mesi në fakt ka shënuar në 19 sezone nga 20 ku ka luajtur në Champions. E nisi aventurën në sezonin 20042005
kundër Shahtjorit, por pa mundur të shënonte. Një sezon më vonë, në atë 20052006, Mesi shënonte ndaj Panathinaikosit për të vijuar për 18 sezone radhazi, rekord që ia ka barazuar Karim Benzema jo më larg se të martën në moshën 35 vjeç. Benzema, i cili e mbylli
sezonin e kaluar si golashënuesi më i mirë në Champions me 15 gola – rekordi i dytë më i mirë pas Kristiano Ronaldos në sezonin 2013-2014 – tashmë është i treti në listën e të gjitha kohërave dhe francezi nuk po di të ndalet duke vendosur rekord pas rekordi.