Bajern-union, “testi” i titullit
Çupo-moting dhe armata berlineze do të matin forcat në portat kundërshtare
“Larmi” do të ishte termi i duhur për të përkufizuar rrugëtimin e Bundesligës gjermane pas 21-javësh të zhvilluara. Dominimi e Bajernit e ka humbur nocionin në fushën e blertë përgjatë këtij sezoni, aty ku kriza e shtatorit dhe fillimi i vitit 2023 mes përqendrueshmërive ka bërë që rivalët të tregojnë dhembët dhe të vënë në presion “pronarët” e 10 viteve të fundit në ligën vendëse. Union Berlin pa diskutim është surpriza më e madhe në kampionatin gjerman. Të besuarit e Urs Fisherit kanë arritur të demonstrojnë qëndrueshmëri edhe pse golat e tyre kanë mbajtur linjën e “silenciatorit”, megjithatë të vlefshëm në sigurimin e sukseseve. Berlinezët do të hasen mbase me misionin më të vështirë në historinë e vet, thyerjen e Bajernit dhe triumfin në Bundesligë. Ky skenar mund të marrë nuanca të paimagjinueshme edhe në letër, pavarësisht se Unioni ia ka dalë të grumbullojë të njëjtën kuotë pikësh sa bavarezët pas 21 raundesh (43 pikë). Mynihu do të jetë arena e betejës për përcaktimin e forcës së “vërtetë”, se kush prej këtyre dy ekipeve, me histori gati në skaje të ndryshme, do të mbizotërojë në krye edhe pas duelit në fjalë, madje duke e “nuhatur” më pranë aromën e titullit. Më poshtë po ju prezantojmë me disa nga statistikat nga sfidat mes tyre dhe gjendjen aktuale:
TË PATHYESHËM-GJIGANTËT nga Mynihu nuk kanë dalë kurrë kokulur nga takimet e luajtura kundër Union Berlinit, përkthyer me 4 fitore dhe 3 barazime, çka do të thotë se “Hekurat”, së bashku me Rot-veis Oberhauzen dhe Dramshtat janë të vetmet ekipe që nuk i kanë mposhtur. Gjithsesi nuk mund të anashkalohet se të dyja kampet nuk i njohin humbjet në tempullin e vet përgjatë sezonit aktual.
Diferenca-golavarazhi i jep të drejtë djemve të Nagelsmanit të mburren si sulmi më i mirë, që pasohet edhe në golavarazhin e
përgjithshëm (+40). Miqtë, marrë në konsideratë edhe potencialin e tyre të kufizuar, nuk e kalojë kuotën e +11.
GJENDJA-SKUADRA e Fisherit është treguar e aftë në grumbullimin e 16 pikëve pas
8 javësh në vitin 2023, duke qëndruar vetëm pas Borusia Dortmundit (18 pikë). E dhëna në fjalë bën që Nagelsmani dhe tifozët e Bajernit duhet ta marrin seriozisht formën e Unionit. Rekordmenët nga ana tjetër kanë një pamje ndryshe, 3 fitore dhe 3 barazime, e thënë me fjalë të tjera 12 pikë nga 18 të mundshme, mesatare kjo jo pozitive.
TABUTË- Erik Maksim Çupo-moting do të jetë më shumë gjasa në krye të sulmit me misionin e qartë, finalizimet e rasteve dhe tërheqjen e ekipit drejt portës rivale. Interesante është fakti që sulmuesi kamerunas nuk e ka dëgjuar në asnjë rast topin në kuadratin e Berlinezëve, indicie me e fortë se përse 33vjeçari duhet t’i bëjë llogaritë mirë përpara se të godasë në kuadratin e Ronovit.
Goleadorët-konkretizimi i mundësive në takime përcaktuese merr rëndësi specifike, pikërisht ato episode ka peshë të shkatërrojnë apo kurorëzojnë një sezon të tërë. Nëse në 7 javët e para të ligës vendëse Unioni ishte i varur në repertorin e Bekerit, tashmë kjo gjë ka ndryshuar. 12 është numri i futbollistëve të përfshirë në gol për ta, statistikë domethënëse se nga çdo repart mund ta pësosh. Vendësit vijnë më të profilizuar në këtë drejtim me treshen ofensive Koman-çupomoting-musiala.