Kupa, Josa i luan të gjitha
Trajneri i bën analizë humbjes me Kastriotin, nuk kursen kritikat për lojtarët kryesorë
Vllaznia luan një ndeshje shumë të rëndësishme nesër ndaj Partizanit, pasi në dy sezonet e fundit ekipi shkodran ka treguar se Kupa është një objektiv shumë i rëndësishëm për ta. Përveç këtij fakti, është edhe një sfidë, që mund vendosë mbi të ardhmen e trajnerit Mirel Josa. Dy hapat fals në kampionat kanë krijuar një situatë mjaft të nxehtë te shkodranët dhe një hap tjetër i dështuar pritet të pasohet me rokadë në stolin e shkodranëve. Drejtuesit nuk e pëlqejnë aspak faktin që skuadra nuk ka vazhdimësinë e duhur, pavarësisht investimeve të bëra në muajin janar, kur rikthyen në Superiore një si Bekim Balaj.
ANALIZA - Tekniku i Vllaznisë, Mirel Josa nuk ka lënë pa analizuar humbjen e fundit ndaj Kastriotit, teksa një gjë e tillë është bërë e ditur edhe nga vetë klubi shkodran. Pa u “pjekur” plaga e humbjes me Kastriotin, ekipi i Vllaznisë ka nisur menjëherë përgatitjet për ndeshjen e Kupës së Shqipërisë ndaj Partizanit ditën e nesërme në Shkodër. Por përpara se futbollistët të zbrisnin në fushën e stërvitjes, ata bashkë me stafin teknik, për afro 40 minuta kanë zhvilluar analizën e ndeshjes së kaluar me Kastriotin, duke nxjerrë edhe mësimet e duhura nga kjo disfatë dhe sigurisht për të marrë masat që ato gabime të mos përsëriten në të ardhmen. Tekniku Josa mësohet se ka qenë i ashpër me të tijtë duke u ndalur te gabimet e bëra në prapavijë dhe te mosfunksioni siç duhet në vijën e sulmit. Ai ka theksuar se kundërshtari ka përfituar nga
gabimet e bëra në prapavijë. GABIMET - Nga ana tjetër faza sulmuese është shumë larg pritshmërisë. Trajneri është ndalur edhe te gabimet konkrete edhe të lojtarëve që kanë mbajtur edhe peshën e skuadrës. Mësohet se është analizuar rasti i pësimit të golit, por edhe mosshfrytëzimi i mundësive të krijuara. Më pas një pjesë e konsiderueshme e minutazhit të kësaj analize i ka marrë përballja e së mërkurës në Kupë ndaj Partizanit. Tekniku Josa ka kërkuar që ato gabime të shfaqura në këtë takim dhe të mos përsëriten në ndeshjen e nesërme ndaj Partizanit, duke kërkuar për më tepër që lojtarët të kenë edhe më shumë impenjim. Nga sa mësohet, lojtarët nga ana e tyre nuk kanë debatuar dhe nuk kanë diskutuar mbi ato problematika që ka shprehur tekniku Josa.