“Poker” Besës, Flamurtari i lë targën... Dinamos
Juri shënon me penallti, Oliveira dhuron shou me tripletë
Flamurtari nuk fal, likuidon Besën në stadiumin “Tomori”. I shënon katër gola dhe ngjitet e dyta, duke i lënë targën Dinamos. Kuqezinjtë janë rifutur fuqishëm në luftë për kreun, pasi tani janë vetëm -1 nga Skënderbeut. Duket se do të kemi një garë si në kohët e vjetra mes këtyre klubeve, por këtë herë në Kategorinë e Parë. Trepikëshi u “gatua” nga brazilianët. Një penallti e Jurit Merlim dha avantazhin, ndërsa për “shoun” mendoi Indio Oliveira. Bëri jo pak, por tre gola. Kavajasit edhe rihapën lojën, me atë penallti të Hoxhës. Edhe pse në superioritet numerik, pas daljes së Liçajt, nuk bën dot më shumë. Vlonjatët jo vetëm mbrojtën fitoren, por shënuan edhe një gol të 4-t.
PJESA E PARË
Flamurtari e nisi direkt në sulm lojën. Pas një goditje dënimi të Floresit që shkoi mbi tra, nuk vonon as goli. Sapo kishte hyrë e 7-ta minutë dhe ka penallti. Nurja ndërhyn ndaj Fernandos dhe kryesori tregon pikën e bardhë. Godet Juri dhe shënon për 0-1. Besa hyn në lojë pas disavantazhit dhe gradualisht nis reagimin. Hoxha, Veriu dhe Ntepe vënë në vështirësi prapavijën vlonjate dhe portierin Kuka, por barazimi nuk duket. Sikur të mos mjaftonte shënjestra e gabuar, nuk kanë as fat. Në të 32-ën Onuh ndalet nga shtylla në rastin më perfekt të ndeshjes. Në momentin që kavajasit i afrohen barazimit, e pësojnë. Fernando harkon një top perfekt në zonë dhe Oliveria përfiton nga “përgjumja” e mbrojtjes dhe realizon me kokë. Besa shokohet, por nuk dorëzohet. Rrezikon Onuh-ntepe, por topi vetëm sa kalon pranë pingules.
PJESA E DYTË
Besa bën tri zëvendësime direkte. Dalin nga loja Veriu, Raza e Ntepe, për t’i lënë vendin Balit, Kukajt e Sulovarit. Kavajasi i afrohet portës, por finalizon dobët. Flamurtari duke parë pafuqinë e Besës për të shënuar, hidhet sërish në kërkim të golit dhe në të 55ën ia del. Beqja niset në kundërsulm të shpejtë dhe asiston brenda zonës për Oliveirën, që e mposht sërish Dobjanin. Tre minuta më pas, Liçaj ndal një top me dorë në zonë dha ka 11-metërsh. Është Hoxha që gjuan dhe shkurton shifrat në 1–3. Krijohet iluzionin se ky gol do të rihapte, derisa kundërshtari mbeti me 10 veta, por jo. Flamurtari nuk hoqi dorë nga sulmi dhe në minutën e 61-të i jep goditjen “nock out”-it Besës. Ishte përsëri Olivera që realizon, duke çuar në dëlir vlonjatët. Në shifrat 1-4, Besa u dorëzua plotësisht.