“Nuk kënaqem kurrë me gola, e dija që do të merrnim vendin e dytë”

Marcelo Troisi i kënaqet pikëve, ndonëse priste më shumë gola. Trajneri e dinte që do ta parakalonin Dinamon dhe hapur e thotë që tashmë “sytë” ia ka vënë kreut. Gjatë një interviste të dhënë për “Panorama Sport”, braziliani tregon se e kishin marrë seriozisht kundërshtarin dhe kjo solli atë fitore të lehtë dhe të thellë.

E kishit menduar kaq të lehtë dhe të thellë fitoren përballë Besës?

Të them të drejtën, mua më kënaq realizimi i objektivit, pasi kishim ardhur në Berat pas një pune serioze dhe vlerësimi maksimal për kundërshtarin, që meriton respekt maksimal për emrin dhe traditën që ka. Por mendoj se nuk ka qenë aspak një fitore e lehtë, se pavarësisht rezultatit, gjithçka ka ardhur falë impenjimit të skuadrës, e cila ka luajtur e mobilizuar nga fillimi deri në fund të takimit.

Gjatë gjithë kohës ju kemi parë mjaft aktiv në pankinë, edhe atëherë kur kryesonit me tre gola diferencë. Pse?

Futbolli është i atillë që rezervon të papritura dhe këtë po e shikojmë edhe në futbollin europian, kështu që duke vlerësuar Besën si një skuadër të fortë dhe të vështirë, që për mua është në gjendje të shkaktojë surpriza, i kam kërkuar vazhdimisht futbollistëve të mi që të mos e ulin aspak ritmin dhe të shënonin akoma më shumë gola, pasi kishim disa raste të tjera që i kemi shpërdoruar. Unë personalisht kam filozofinë time, ndeshja fitohet edhe kur kundërshtari bën tre gola, që do të thotë se ne duhet të bëjmë katër. Por nuk doja që gjërat të shkonin deri këtu edhe pse Besa realizoi golin e saj, ndaj doja sa më shumë gola.

Parakaluat Dinamon, por përpara keni Skënderbeun. Do ta zbrisni nga “froni”?

E prisja këtë moment. Flamurtari do t’i rikthehej patjetër luftës për një nga dy vendet e para, sepse ky është edhe qëllimi ynë. Puna që po zhvillojmë na i imponon këtë renditje të kushtëzuar nga organika dhe investimi serioz. Por si thoni ju shqiptarët, ne mbetemi me këmbë në tokë, sepse kampionati është ende i gjatë dhe ka shumë javë përpara. Diferenca minimale me Skënderbeun, premton një garë të fortë dhe interesante deri në fund të kampionatit.

Mendoni se skuadra po i përgjigjet stilit tuaj?

Po dhe jam i kënaqur për një arsye të thjeshtë. Po luajmë bukur dhe skuadra premton edhe më shumë. Puna e një trajneri asnjëherë nuk njeh kufij. Kërkesat për t’u përmirësuar nuk mbarojnë kurrë edhe më shumë në të ardhmen. E rëndësishme është se kjo skuadër edhe të argëton në lojë, por edhe garanton rezultate. Edhe më mirë këtë do ta tregojmë në pjesën e mbetur të kampionatit. Falë punës, do të marrim atë që meritojmë.