Silvinjo: Superiorja ka talente, kapim Europianin

“Kam ardhur me synim të qartë, gjuha shqipe shumë e vështirë”

Trajneri i Kombëtares: Besoj te kualifikimi me këtë grup

Trajneri i Kombëtares shqiptare, Silvinjo, ka dhënë së fundmi një intervistë speciale për median e njohur braziliane “Estadao”, ku u ka zbuluar bashkëkombësve të tij Kombëtaren kuqezi, dhe ambiciet e qarta për t’u kualifikuar në “Euro 2024”. Ndër të tjera tekniku 48-vjeçar që zëvendësoi Rejën, e ka cilësuar gjuhën shqipe si një nga më të vështirat në botë. Në rrëfimin e tij Silvinjo është shfaqur tepër optimist, teksa tregon se ka mbetur i kënaqur edhe nga lojtarët që aktivizohen në kampionatin shqiptar. “Kur pranova ofertën e Shqipërisë, e dija mjaft mirë që synimi i tyre ishte një trajner i huaj. Qëllimi kryesor është të kualifikohemi në “Euro 2024”, shprehet fillimisht braziliani.

KURSI- Trajneri më pas u ndal te puna e vështirë që ka zgjedhur të bëjë, duke treguar se iu desh të bënte kursin e UEFA-S për një afat pesëvjeçar për shkak të angazhimeve. “Kam udhëtuar në vitet e fundit qoftë në Brazil, Japoni, Australi apo në Shtetet e Bashkuara të Amerikës. M’u deshën pesë vite për përfundimin e kursit të UEFA-S. Kam humbur pushime të rëndësishme. Ne, brazilianët, jemi trajnerë të mirë, që dimë të punojmë, jemi premtues dhe pa dyshim duam kohën tone”.

GJUHA SHQIPE- Silvinjo tregoi edhe një nga elementet më të rëndësishme, që është gjuha. Sipas tij gjuha

jonë është ndër më të vështirat në botë. “Unë jam i lumtur që jam mes tyre. Gjuha shqipe është një nga më të vështirat e botës. Ndryshe nga sa thonë njerëzit, puna këtu në Shqipëri nuk mungon. Merremi me shumë analiza, përmbledhje, klipe

lojtarësh nga 90 minuta prej secilit prej 30 futbollistëve të mundshëm që do të thirren”.

LOJTARËT- Trajneri foli edhe për lojtarët që do të thirren në grumbullimin e parë. “Së paku, shtatë futbollistë do të thirren nga Seria A. Nga tri udhëtimet e rëndësishme, dy ishin drejt Italisë. Të tjerët luajnë në Angli, Spanjë, Turqi dhe Greqi. Unë ndjek dhe kampionatin vendës, teksa kemi vënë re 2-3 futbollistë të rinj me shumë talent për të qenë pjesë e jonë. Do të jem i drejtpërdrejtë me ju, kam besim se mund të kualifikohemi në Europian, pasi grupi është vërtetë i balancuar”, deklaroi Silvinjo, i cili në 5 mars do të publikojë listën e lojtarëve që do të jenë të grumbulluar për ndeshjen e parë eliminatore me Poloninë në transfertë.