Alegri surprizon përpara Torinos: Pogba, gati të luajë
R “ingjallje" do të ishte termi i duhur për të përkufizuar formën aktuale nga ekipi i Juventusit. Vendimi i Federatës së Futbollit Italian për ta ndëshkuar me zbritje prej -15 pikësh u mendua se do të shkaktonte "tërmet" me pasoja të pandreqshme. Megjithatë, në tri javët e fundit në Serinë A rruga e sukseseve ka ardhur sa hap e mbyll sytë, shto edhe kualifikimin për në fazën tjetër të Europa Ligës. Deklarata e fundit nga Masimiliano Alegri në vigjilje të derbit ndaj Torinos mbrëmjen e sotme i rrit më tepër notat e euforisë në shtëpinë e "Zonjës së Vjetër" mbi rikthimin e disa personazheve me peshë në letër, pasi verdikti final do të jepet në fushë.
RIKTHIMET-"LAJMI më i rëndësishëm në prag të derbit është se Pol Pogba dhe Frederiko Kieza i janë përveshur punës në stërvitje dhe kanë dhënë sinjale të qarta se janë gati. Vlen të përmendim se Pol ka kaluar 315 ditë nga ndeshja e fundit në fushën e blertë, kaq mjafton për të kuptuar se sa kujdes duhet të kemi me të. Milik nuk është i disponueshëm, sikurse Mireti, Kai Jorge dhe Lokateli. Ende nuk e kam vendosur përfundimisht mbi bazë të ndërtimit të skemës dhe përfshirjen e emrave të caktuar, çka do të thotë se jam duke i menduar me imtësi, marrë në konsideratë edhe vazhdimësinë, pasi ridëmtimi do të kishte kosto në shumë drejtime, jo vetëm te lojtari. Është fakt se impakti i çdo futbollisti luan rol të rëndësishëm në gjetjen e vazhdimësisë dhe mbajtjen e frymës pozitive, sigurisht me fitore", tha mes buzëqeshjesh Masimiliano.
GJENDJA e kapitenit-"bonuçi do të qëndrojë ende në pankinë, pasi faza e rikthimit kërkon kohë. Më vjen mirë që ai ka dëshirë të rikthehet sa më parë në fushën e blertë, tregues se çfarë shpirti luftarak ka. Prania e liderit mbart gjithmonë peshë të rëndësishme në një ekip, i cili shërben si pikë reflektim në situata të ndryshme", pohonte me fjalë suportuese tekniku 55-vjeçar.
RIVALI- "Torino intensitetin e ka si meny të zakonshme ndaj ekipeve kryesore, besoj se të njëjtën strategji do të përdorë edhe ndaj nesh. Derbi mbetet gjithmonë special dhe ky është detaj shtesë se përse të dyja kampet do të përpiqen të japin më të mirën. Ndërhyrja dhe kartonët nuk kanë për të munguar e ku ne duhet të shfrytëzojmë momentet tona për t'i dhënë jetë qëllimit, fitores".
OBJEKTIVI- "Vendi i 4-t në tabelë mbetet objektivi kryesor në këtë pikë ku ndodhemi. Bolonja me suksesin ndaj Interit na u largua përkohësisht, gjithsesi skuadra si Atalanta, Lacio dhe Roma gjenden sipër nesh, madje me diferencë jo të vogël, tregues se ecuria jonë duhet të jetë me ritëm të plotë. Avancimi në Europa Ligë të jep mundësi të arkëtosh të ardhura dhe të rrisësh pretendimet, ndonëse nga krahu tjetër ngjesh numrin e ndeshjeve. Të shpresojmë se do t'ia dalim, përtej gjithë sprovave", nënvizonte me frymë shpresëdhënëse Alegri.
PENALITETI- "Shumë gjëra do të ishin ndryshe, nëse ajo zbritje kolosale pikësh nuk do të ishte ndërmarrë ndaj nesh. Juventusi gjithmonë ka luftar fort me rivalët edhe në vitet kur nuk ia ka dalë të sigurojë trofeun. Forma e dobët në fillim të kampionatit na dëmtoi psikologjikisht. Megjithatë, ne e gjetëm guximin të vendosnim rekord me ecuri mbresëlënëse si askush tjetër. Sërish goditje dhe kësaj here jo për fajin tonë", përfundoi trajneri i bardhezinjve.