Nga -8 në -18 pikë, Interit i rrëshqiti kreu për 53 ditë

Pas humbjes së mbërritur në Bolonja, u shuan edhe shpresat e tifozit më të çmendur të zikaltërve për titullin. Napoli tani marshon i qetë drejt kurorëzimit si kampion Italie, falë 18 pikëve diferencë me vendin e dytë të ndarë mes milanezëve. Me rikthimin e kampionatit në janar, u duk se Interi mund të ishte rivali i "Axurrëve" për kreun, duke parë se në ndeshjen e parë të 2023-shit shkaktoi humbjen e parë skuadrës së Spaletit në Serinë A dhe shkurtoi distancën në 8 pikë. Në momentin më të mirë ama, atëherë kur u duk se gara për titullin u rihap, zikaltrit lanë shumë pikë rrugës deri në sfidën me Bolonjën. 53 ditë më pas hendeku është më shumë se i dyfishuar dhe ka shkuar në 18 pikë, jo vetëm falë ecurisë perfekte të Napolit, por mbi të gjitha si rezultat i mungesës së vazhdimësisë së zikaltërve. Barazimi me Monzën, humbja ndaj Empolit, barazimi me Sampdorian dhe humbja e fundit përballë Bolonjës kanë bërë jo pak konfuzë të gjithë ambientin mbi arsyet e vërteta të kësaj gjendjeje të Interit.

LUHATJET - Cili është Interi i vërtetë? Është kjo pyetja e të gjithëve, duke marrë parasysh paraqitjet me dy fytyra të skuadrës së Inzagit. Formacioni i vetëm që arriti të mposhtë Napolin, ai që i dha leksion në Superkupë Milanit dhe më pas nuk e fali as në derbin e kampionatit, e mbi të gjitha ai që bëri atë prezantim fantastik ndaj Portos, ka zhgënjyer ndaj atyre skuadrave që renditen në mesin e tabelës në Itali, me shembullin konkret që ishte transferta e "Dall'ara"-s. Një Inter i fikur, pa grintë dhe dukshëm inferiore në motivim dhe agresivitet, në një ndeshje që vërtet nuk shërben më për titullin, por duhet të shërbente për të qëndruar i qetë në katër vendet e para. Milani i ka mbërritur tashmë në vendin e dytë dhe Lacio, Roma e Atalanta janë gjithmonë aty pranë, të gatshme për të përfituar, me Interin që tani duhet t'i bëjë llogaritë jo me ata që ndjek, por me ndjekësit.