Enisa Qosja e Tiranës dhe Gray i Kamzës, MVP-TË e javës

Basketbolli shqiptar vijon me sfidat e kampionateve kombëtare si te femrat gjithashtu edhe te meshkujt. Si gjithnjë, duke iu referuar statistikave individuale, FSHB ka shpallur edhe lojtarët më të mirë të javës. Në radhët e vajzave, vlerësimi MVP i javës së 12-të ka shkuar për Enisa Qosjen e Tiranës. Me 18 pikë, 5 ribaunde dhe 4 asiste, duke regjistruar indeksin 29 në fitoren e vajzave bardheblu kundër Vllaznisë, Qosja kishte rendimentin më të lartë gjatë kësaj jave. Ndërkohë, në formacionin më të mirë të javës ka vend edhe për tri lojtare të Partizanit, me të kuqet që siguruan një fitore në shifra të ekzagjeruara kundër Barletit. Kështu, për ekipin kryeqytetas spikatën kapitenia Ornela Lalaj me 14 pikë, 6 ribaunde dhe 4 asiste, Ketjona Fekollari me 14 pikë, 5 ribaunde dhe 6 asiste, si dhe amerikania Amarah Coleman, autore e 10 pikëve, 9 ribaundeve e 8 asisteve. Ndërsa “top-5” plotësohet nga kongolezja e Flamurtarit, Liliane Ndongbwo, protagoniste me 14 pikë, 13 ribaunde dhe 1 asist në suksesin e skuadrës vlonjate kundër Elbasanit. Duke kaluar te Superliga e meshkujve, vlerësimin e lojtarit më të mirë të javës së 13-të e mori Quinton Gray i Kamzës. Amerikani regjistroi 31 pikë, 6 ribaunde dhe 12 asiste, në triumfin e skuadrës së tij kundër Vllaznisë. Në “top-5” ka vend edhe për tre amerikanë të tjerë: Tavis Pisol nga Vllaznia (20 pikë, 6 ribaunde, 6 asiste), Robert Whitfield i Apolonisë (24 pikë, 7 ribaunde, 3 asiste) dhe Brandon Morris i Besëlidhjes (23 pikë, 3 ribaunde, 6 asiste). Ndërkohë, i vetmi lojtar shqiptar në formacionin më të mirë të javës në Superligë është Julian Hamati i Tiranës, i cili bëri një ndeshje të shkëlqyer duke rezultuar deciziv në suksesin e bardhebluve kundër Teutës. Hamati koleksionoi 20 pikë, 6 ribaunde dhe 6 asiste.