Malota si zjarrfikës, stërvitje e përbashkët pas ndeshjes
Një numër i ulët tifozësh, vetëm 300, e kanë ndjekur dje takimin mes Egnatias dhe Laçit. Në vendet e rezervuara për tifozërinë mike viheshin re stolat tërësisht të zbrazur. Në fakt të dyja tribunat qendrore në anën veriore kanë qenë të gjitha të boshatisura. "Panorama Sport" ju sjell pikantet e ndeshjes së luajtur në Rrogozhinë.
* Ndryshe ka ndodhur me zonën VIP. U pa mbipopullim i saj më tepër se zakonisht. Ra në sy prania e kryebashkiakut Edison Memolla, si dhe e deputetit që mbulon Kavajën dhe Rrogozhinën, Etjen Xhafaj. Si zakonisht të pranishëm ishin drejtuesit e Egnatias, me në krye presidentin Agim Demrozi, ndërsa nuk u pa ai i Laçit, Pashk Laska, i cili në fakt është i dënuar nga Komisioni i Disiplinës.
* Qendra e zërit moderne që posedon klubi Egnatia dje është vënë tërësisht në dispozicion të tifozëve, të cilët u njohën me formacionet e ekipeve dhe disa herë kjo mori duartrokitjet e publikut vendës.
* Në minutën e 27-të arbitri ndërpret lojën dhe shkon të konsultohet me qendërmbrojtësin Renato Malota të Egnatias, duke shuar një debat të panevojshëm për një faull në distancë të largët me portën.
* Në minutën e 52-të, Atanda del jashtë vijës anësore me lejen e arbitrit, sepse kishte rrjedhje gjaku nga hundët. Ndërhyrja e shpejtë nga stafit mjekësor bënë që mpiksja e gjakut të mbyllet shpejt e lojtari pa vonesë të rifutej dhe vijuar normalisht lojën.
* Pas ndeshjes, veçmas atmosferës miqësore të shtrëngimit të duarve, futbollistët e paaktivizuar të të dy ekipeve, 8 lojtarë nga Egnatia dhe 6 nga Laçi, kanë dalë në fushë dhe kanë improvizuar prej afro 15 minutash një ministërvitje relaksuese, duke pasur pranë pjesëtarët e stafeve teknike, pasi trajnerët ishin të angazhuar me mediat.
* Terreni i mirë dhe koha me diell gjatë ndeshjes, në një temperaturë 18 gradë, sollën dje aromën e mbërritjes së parakohshme të pranverës.