Çaço: Na shijoi shumë triumfi ndaj bluve
Entuziazmi mbizotëron në kampin beratas, por edhe te tifozëria pas asaj fitoreje shumë të rëndësishme që Tomori arriti përballë Dinamos në transfertë. Duke u nisur nga statistikat, për Tomorin kjo është fitorja e dytë në historinë e ballafaqimeve të luajtura në kryeqytet mes dy skuadrave. Të gjithë pa përjashtim kanë vlerësuar jo vetëm rezultatin, por kanë veçuar si një tipar dallues në lojën e skuadrës, karakterin e fortë të futbollistëve. Pas kthimit nga Tirana dhe një dite pushimi, skuadra ka dalë të martën në fushën e stërvitjes për të nisur përgatitjet për ndeshjen e radhës ndaj Orikut në shtëpi. Për “Panorama Sport”, kapiteni i Tomorit, Ervis Çaço, ka komentuar jo vetëm rëndësinë e fitores historike ndaj Dinamos, por edhe motivimin që duhet të kenë futbollistët për javët në vazhdim. Sipas kapitenit të Tomorit, gjithçka duhet ta vendosin në funksion të renditjes mes gjashtë skuadrave më të mira. “E kemi të pamundur që të fshehim entuziazmin tonë pas fitores me Dinamon, që ka brenda vlera të dyfishta. Ishte një fitore për tifozërinë beratase, që aq shumë i shijon suksese të tilla ndaj skuadrave kryeqytetase në fushën e këtyre të fundit. Për ne si skuadër nuk kanë rëndësi problemet që po kalon kundërshtari ynë. Jemi shumë të kënaqur dhe ju gëzuam trefish kësaj fitoreje. Por, nuk jemi mjaftuar vetëm me triumfin, as me faktin që i mundëm në fushën e tyre, duke i zbritur nga froni i kryesimit. Ajo që mund të veçojmë dhe që meriton vëmendje, ka të bëjë me sensibilitetin e krijuar te tifozëria jonë. Të gjithë në Berat kanë mbetur të kënaqur me këtë fitore, që është një lloj shpagimi pas atij barazimi aq shumë të diskutueshëm në fazën e parë në fushën tonë. Ka qenë Dinamo që na ka mohuar fitoren në mënyrë të padrejtë. Për mua si kapiten, e gjithë skuadra meriton përgëzime dhe vlerësime maksimale për fitoren në kryeqytet, por e rëndësishme mbetet vazhdimësia e fitoreve. Na pret një ndeshje me Orikun në shtëpi, ku tri pikët do të na jepnin një tjetër shans për t’u renditur dhe stabilizuar në gjashtë vendet e para. Sikurse dihet, Tomori synon fazën ‘play off’”, deklaroi Çaço.