Ronaldo injoroi Mesin, ja për kë votuan Shqipëria dhe Kosova
FIFA organizoi ceremoninë e ndarjes së çmimeve "The Best" për të shtatin edicion radhazi. Për zgjedhjen e lojtarit më të mirë të vitit, çmim që e fitoi dhe meritoi Lionel Mesi, kampion i sapozgjedhur i botës me Argjentinën, morën pjesë të gjithë kapitenët dhe trajnerët e kombëtareve, anëtare të FIFA-S. Për sa i përket të "nominuarve" të përfaqësueses shqiptare, Trajneri Silvinjo ka zgjedhur në vend të parë pikërisht fituesin Lionel Mesi dhe pas tij Karim Benzemanë dhe bashkatdhetarin Nejmar. Ndërkohë, për sa i përket kapitenit Etrit Berisha, ai gjithashtu vendosi që 5 pikët t'ia dhurojë "Pleshtit", ndërsa pas argjentinasit preferencat ishin Erling Haland me 3 pikë dhe Kilië Mbape me 1. Edhe kapiteni i Kosovës, Amir Rrahmani, së bashku me trajnerin Alan Zhires, kanë zgjedhur Leo Mesin të parin. Qendërmbrojtësi i Napolit vendosi në vend të dytë Mbapenë dhe Viniciusin, ndërsa trajneri francez vendosi dy bashkëkombësit e tij, Benzema e Mbape.
RONALDO & CO - Ndërkohë, mes qindra votimeve, ajo që ra në sy është se rivaliteti i ashpër mes Kristiano Ronaldos dhe Lionel Mesit vazhdon dhe nuk ka ndërmend që të përfundojë, derisa njëri apo të dy të varin këpucët në gozhdë. Kapiteni i Portugalisë mësohet se e ka injoruar totalisht kampionin e botës, duke përzgjedhur Kilipë Mbapenë të parin, Luka Modriçin dhe Karim Benzemanë. Për sa i përket përfaqësueseve të tjera të mëdha, Italia me kapitenin Bonuçi dhe trajnerin Mançini kanë përzgjedhur Mesin. Edhe Gjermania me Manuel Nojerin dhe Hansi Flikun kanë votuar për "Pleshtin", ndërsa te Spanja ka habitur trajneri i ri, Luis de la Fuente që votën ia ka dhënë argjentinasit tjetër, Hulian Alvarez, ndërsa Buskets normalisht zgjodhi ish-shokun te Barcelona. Ndërkohë, vetë fituesi Lionel Mesi votën ia ka dhënë brazilianit Nejmar, ndërsa trajneri Skaloni sigurisht që ka votuar për kapitenin e tij, Lionel Mesin.