Takim për 100-vjetorin, Idrizi: Superiorja e panegociueshme
Sinan Idrizi premton Flamurtarin në Superiore për 100 vjetorin e klubit. Presidenti e ka bërë deklaratën gjatë takimit të organizuar në zyrën e kryetarit të Bashkisë së Vlorës, Dritan Leli. Kryebashkiaku mblodhi të gjithë përfaqësuesit e sporteve, për të folur rreth propozimeve dhe ideve për kremtimin më 25 mars të këtij përvjetori(që realisht është më 23 mars) të rëndësishëm. Idrizi theksoi, se ka dështuar në fushë, pavarësisht se ka fituar në pjesën e taksimit dhe financimit ku nuk i ka marrë klubit asnjë qindarkë gjatë këtyre tetë viteve. Kreu i klubit edhe në këtë takim, ka ripërsëritur objektivin, duke u shprehur se Flamurtarin e do në vendin e parë në renditje. "Ju kryetar, jeni i kujdesshëm për çdo gjë, si për Flamurtarin, qytetin, por edhe për këtë 100 vjetor. Të falënderoj që gjen kohën dhe mbledh shumësportëshin e qytetit. Te pjesa e futbollit nuk kam gojë të flas tani. Kam fituar te qytetari apo te pjesa e taksimit dhe tek ajo e financimit, pasi në këto vite e kam mbajtur vetë klubin, duke mos futur duart në xhepat e qytetarëve. Por, kam dështuar në futboll dhe në fushë. Këtë pjesë nuk kam ditur ta bëj mirë. Ndaj dhe unë kam kodin tim 2023, dhe kjo është e panegociueshme. E kam bërë të qartë edhe për stafin teknik aktual dhe për futbollistët, që unë dua vendin e parë në kampionat, as të dytin dhe as të tretin, por të parin", shprehet fillimisht Idrizi. Por, Sinan Idrizi nuk ka lënë pa thumbuar ishfutbollistët e Flamurtarit. Nuk ka folur me emra konkretë, por duket se e ka pasur me ata që gjatë kësaj periudhe kanë qenë kritikë me klubin, apo edhe me politikat e tij. "Kreshnik Çipi bashkë me një grup të veteranëve të Flamurtarit të viteve '80-'90, kanë organizuar pjesën e 100 vjetorit te Flamurtarit në futboll. Unë jam te historia e Flamurtarit të sotëm, lavdinë t'ua lëmë këtyre që e kanë pasur në këmbët e tyre. Megjithëse disa nga këta që kanë pasur lavdinë në këmbë, kujtojnë se lavdia ju ka kaluar në kokë. Por duhet ta dinë se është diferencë e madhe nga koka te këmbët. Kreshnik Çipi është nga ata që kokën e ka plot, është me lavdi, ka qenë ligjvënës, është i kujdesshëm dhe ka bërë një program të mrekullueshëm për 100 vjetorin", u shpreh Idrizi.
KRYEBASHKIAKU
Përfaqësim dinjitoz për të gjitha sportet në jubileun e 100 vjetorit të Klubit Shumësportësh. Kjo është kërkesa e Dritan Lelit. Leli shprehu kënaqësinë e tij që do të jetë në detyrë në këtë vit jubilar. "Dua angazhimin e të gjithëve për këtë eveniment, duke pasur qershinë mbi tortë, që është ekipi i futbollit "Flamurtari". Ajo që do të doja nga të gjithë ju është që të kemi angazhimin e të gjithëve që në 23 mars, të gjejmë një mënyrë përfaqësuese të përbashkët. Do të doja që nga ju të kishte ide për një përfaqësim dinjitoz të të gjitha disiplinave sportive, që kanë bërë historinë e tyre. Çdo javë deri në datë 23 mars të bëjmë takime çdo javë. Dua ide për personazhet që ne duam që të kujtojmë në këtë 100 vjetor, duhet të promovojmë kampionët. Ta quajmë javën e 100 vjetorit të Flamurtarit dhe ta kurorëzojmë me aktivitetin e madh. Është një nga ceremonitë e veçanta dhe ndihem me fat që do të jem me ju për të festuar", shprehet Leli. ERMAL SIKA