Perja: Stadiumi, problemi ynë

Besa është mundur nga Flamurtari në fundjavë. Disfata ka lënë shije të keqe te futbollistët. Kapiteni Skerdian Perja ndalet te një element, që sipas tij askush nuk dëshiron ta përmend e ta vlerësojë peshën e tij. Sipas tij, Besa është i vetmi ekip i Kategorisë së Parë që luan jashtë stadiumit të vet. "Më bën përshtypje se të gjithë kur gjykojnë Besën e matin me të njëjtin kut sikurse Flamurtarin, Skënderbeun, Korabin, Apoloninë, Lushnjën e të tjera ekipe që luajnë në stadiumet e tyre para qindra tifozëve. Ai që ka luajtur qoftë edhe 3 ditë futboll, e kupton peshën e madhe që ka fusha jote, ku të brohorasin mijëra tifozë, apo faktin se çdo kundërshtar i yni vjen të luajë kundër Besës në fushë asnjanëse. Ky është avantazh psikologjik jo i vogël për ta. Nuk dua të justifikoj aspak gabimet tona në humbjen me Flamurtarin, por ta provojë njëherë Vlora, Korça, Peshkopia e kushdo ekip të luajë vetëm jashtë e pastaj të na gjykojnë. E përsëris, se ky fakt nuk amniston gabimet tona që nga takimi i parë me Tomorin deri te humbja me Flamurtarin. Ne kemi gabuar, ndaj kemi kaq pikë, sepse nëse do të luanim në Kavajë ekipet do të ishin duke na parë "targën" sot. "Më tej, kapiteni shprehet i qartë se grupi nuk do ta mbajë mendjen te humbja me Flamurtarin, pasi kampionati vijon. "Jemi ndalur me stafin teknik, me presidentin te ndeshja me Flamurtarin dhe kemi marrë të gjitha përgjegjësitë tona. Ne jemi përgjegjësit dhe na takon ne të reagojmë. Që sot e kemi hedhur pas krahëve atë humbje dhe po përgatitemi për takimin e radhës. Na pret një tjetër ballafaqim i vështirë dhe nuk mund të rrimë peng i analizës së një humbjeje. Nga sot, me kokën ulur do të punojmë deri në fundjavë me tërë përgjegjësinë për reagimin tonë. Na duhet qetësi, punë e djersë që Besa të rikthehet", tha Kapiteni. FERIZ FERIZAJ