Kaina bëri dopietë, Josa është në “hall” me Balajn

Shkodrani mund ta nisë sërish nga stoli, trajneri në siklet

VLLAZNIA/ Sulmuesi brazilian bindi në sfidën me Partizanin

Dopieta në ndeshjen e parë çerekfinale të Kupës së Shqipërisë ndaj Partizanit i ka dhënë një bonus të madh sulmuesit brazilian, Kaina Nunjesh. I rikthyer si titullar pas disa ndeshjeve i lënë në stol, ai tregoi në një takim shumë të rëndësishëm se mund të jetë pika e referimit në sulmin kuqeblu. Trajneri Mirel Josa kishte preferuar që ta niste me brazilianin nga minuta e parë ndaj Partizanit, ndërsa sulmuesi i rikthyer më bujë në

Shkodër, Bekim Balaj, qëndroi në stol dhe u fut në fushë në minutën e 75-të, pikërisht kur rezultati ishte 3-1 në favor të kuqebluve. Kaina bëri dy lëvizje të zgjuara në zonë, duke treguar nuhatjen e një sulmuesi goli. Nga ana tjetër, edhe pse cilësitë e Balajt dihen, ai ende nuk është zhbllokuar në nëntë ndeshje që ka luajtur deri më tani mes kampionatit dhe Kupës. Gjasat janë që Josa të vazhdojë të besojë te Kaina edhe në takimin që do të zhvillohet të hënën në Durrës. Dopieta

e brazilianit ka futur në “hall” trajnerin, i cili në fakt me zgjedhjet e tij ka dashur të largojë edhe presionin që ka pasur Balaj në këtë periudhë.

STËRVITJA - Ka mjaftuar vetëm një dite pushim dhe Vllaznia i është kthyer dje stërvitjes për takimin e radhës ndaj Teutës në transfertë. Në këtë takim Vllaznia shkon më e kompletuar se kurrë. Rikthimet e Bulatoviçit dhe Boshnjakut në 100% të tyre, por gjithashtu Liridon Latifit, kanë ngrohur pamasë Josën. Sinjale pozitive para sfidës ndaj durrsakëve vijnë edhe nga mbrojtësi kroat, Marko Juriç.