Shifrat rrëzojnë optimizmin e Ançelotit pas takimit
“Ka qenë një ndeshje e mirë” deklaronte Ançeloti pas humbjes në “Bernabeu” kundër Barcelonës në Kupën e Mbretit. Një optimizëm që Ançeloti është munduar ta shpjegojë, por që nuk reflektohet nga shifrat e Realit të tij, i cili e mbylli takimin pa goditur asnjëherë portën kundërshtare për herë të parë pas 13 vjetësh. Tri vjet, 5 muaj dhe 13 ditë – 1261 ditë në total – kishte Reali që mbyllte një ndeshje në 90 minuta ka gjuajtur asnjëherë në portë. Ishte 18 shtatori 2019 në humbjen e pësuar në javën e parë në fazën në grupe në Ligën e Kampioneve kur skuadra drejtohej nga Zinedin Zidan. Një mungesë efektiviteti që bëhet më flagrant në shtëpi, pasi që nga viti 2010 publiku i “Santiago Bernabeu” nuk ka shkuar në shtëpi pa parë një qasje vërtet të rrezikshme nga ana e idhujve të tij. Humbja pa lavdi ndaj Barcelonës erdhi pesë ditë pas derbit kundër Atletikos së Madridit, ku gjithashtu Reali kishte treguar një mungesë efektiviteti në sulm: vetëm dy gjuajtje në portë. Shifra të ngjashme ishin regjistruar më parë në këtë sezon edhe ndaj Majorkës, Vajekanos dhe Vijarrealit, të gjithë takime të përfunduara me rezultat negativ. Kundër Barcelonës, Reali ka zotëruar topin në 64.7% të kohës, por kjo nuk mjaftoi për të çarë murin mbrojtës të Barcelonës, e cila zbriti në “Bernabeu” me një plan krejt të ndryshëm nga ai klasiku i saj: protagoniste me topin. Pa Levandovskin, Dembelenë e Pedrin, Ksavi zgjodhi ta vinte në gjumë ndeshjen e gjatë dhe të çonte një rezultat të mirë në shtëpi; dhe ia arriti përballë pafuqisë së Madridit që nuk e trembi dot Barçën e ardhur pas dy humbjeve radhazi. Ajo kundër Barcelonës (29 krosime, baras me ndeshjen kundër Osasunës) ishte ndeshja e gjashtë në të cilën Reali hodhi më shumë se 20 krosime në zonën kundërshtare, por nga këto 6 takime, Reali ka fituar vetëm një, atë ndaj Shahtjorit, ku regjistroi dhe rekordin me 36 gjuajtje, 13 prej të cilave në portë. Shifrat e këtij Reali kanë luhatje të mëdha. Mjafton të mendosh se 9 ditë më parë shënonte 5 gola në Liverpul me 6 gjuajtje në portë. Humbja ndaj Barcelonës në shtëpi dhe të dhënat aspak pozitive nga reparti i sulmit kanë lënë një shije jo të mirë. “Kjo ndeshje më jep shpresë për takimin e kthimit në Barcelonë”, vijonte ai pas takimit. Por fillimisht, lojtarët e tij, veçanërisht ata të sulmit duhet të rregullojnë shënjestrën.