Duamena: Fitore e merituar, ja çfarë më tha gruaja për golat
Është pak ta quash lojtari i momentit. Sulmuesi ganez Duamena ka shënuar 6 gola në 9 ndeshjet që ka luajtur për Egnatian. Dje, në fitoren ndaj Kastriotit ai realizoi një dopietë dhe pas ndeshjes ka folur në një intervistë për “Panorama Sport”.
Emocionet tuaja të para mbi dy golat me peshë që shënuat kundër Kastriotit?
Ndihem tepër i gëzuar që fituam plot meritë në fushën tonë, para tifozëve tanë dhe për veten që i shërbeva shumë skuadrës me golat e mi.
Në Rrogozhinë ju quajnë lojtari i momentit, sa ju frymëzon kjo?
Po i shërbej skuadrës dhe ky moment më vjen mirë që kulmon edhe me formën time. Fitorja e ekipit dhe pikët e marra me një lojë të mirë, janë dy gjëra që më duken më të rëndësishme se çdo gjë tjetër tani për tani.
Kujt ia dedikoni dy golat që shënuat?
Patjetër skuadrës dhe tifozëve rrogozhinas. Ishte fitorja jonë e parë për vitin 2023 në fushën tonë dhe e kuptoj se sa e ka ndihmuar si skuadrën ashtu dhe tifozët ky rezultat i merituar që arritëm. E shoh se çfarë atmosfere e mrekullueshme është edhe tani që po flas me ju.
Statistikat tuaja individuale tek Egnatia tregojnë 6 gola në 9 ndeshje. Si do ta komentoni këtë fakt?
Nuk e fsheh që bashkë me objektivat që ka skuadra edhe unë dua të jem në lartësinë e detyrës sime për të shënuar sa më shumë. Statistikat që ju përmendni nuk e fshehin, por më kuptoni dhe e them me modesti, më japin më shumë frymëzim për ndeshjet e tjera ku më duhet të luaj sa më denjësisht rolin tim.
Kur komunikoni me familjen dhe u tregoni për golat tuaj tek Egnatia, si është reagimi i tyre?
Kanë qenë shumë emocionuese fjalët e tyre. Veçanërisht të bashkëshortes sime. Vazhdo kështu më thotë. Ti je një profesionist i lindur. Po na gëzon e lumturon shumë me formën dhe golat. Ne jemi vërtet krenarë me ty. Këto përgjigje më bëjnë të ndihem vërtet i vlerësuar.
Ndeshja e radhës me Erzenin, si e parashikoni?
E quaj një skuadër të fortë dhe agresive. Vendoset mirë në fushë. Por ne do të luajmë përballë tyre pa asnjë frikë. F.EFICA