Prenga godet dy herë me kokë Pushkashin, edhe Seferi dopietë
Mbrojtësi shkëlqen në Hungari, sulmuesi në Ukrainë
Herdi Prenga ka marrë rolin e një bomberi në ndeshjen e djeshme të kampionatit hungarez, ku Honvedi i tij përballej me Pushkash Akademi dhe fitoi 3-1. Mbrojtësi shqiptar ka qenë autor i dy golave, duke ndihmuar skuadrën në të dy anët e fushës. Përtej paraqitjes pozitive në prapavijë, Prenga ka qenë vendimtar në fraksionin e dytë të lojës, teksa në minutën e 57 ishte ai i cili vendosi barazimin e përkohshëm me një gol me kokë, pas zhvillimit të një goditjeje nga këndi, duke u treguar i vëmendshëm para portierit për ta shtyrë sferën në rrjetë. Vetëm 10 minuta më vonë, Prenga tundi përsëri rrjetën me një tjetër goditje me kokë, përsëri në vijimin e një këndoreje, teksa u tregua më i sakti dhe më efikasi në duelin ajror, mes rrëmujës së zonës dhe i dha avantazhin 2-1 Honvedit. Por ai nuk ishe protagonisti i vetëm i duelit, pasi Albi Doka, shoku i skuadrës së Prengës, ishte ana e shëmtuar e takimit. I aktivizuar në minutën e 79 të takimit, në minutën e 86 u ndëshkua me karton të kuq, duke lënë ekipin e tij me 10 lojtarë, ndonëse ky episod nuk ndikoi në rezultat.
SUPER SEFERI – Ish-sulmuesi i Tiranës ishte protagonist në Ukrainë duke gjetur dy herë rrugën e rrjetës brenda 16 minutave lojë me skuadrën e tij, Vorskla Poltava, ndonëse ndaj
Zoria Luhansk nuk mjaftoi, pasi në fund festuan miqtë 3-2. Sulmuesi i Kombëtares shënoi në minutën e 6-të pas një asisti nga shoku i tij i skuadrës, Ramires. Në fillim hodhi në tokë një kundërshtar, ndërsa më pas shkundi rrjetën. Por Seferi përsëritet edhe 10 minuta më vonë, por këtë herë u tregua
i saktë nga pika e penalltisë dhe dërgoi shifrat në 2-0. Por ajo që u duk një ndeshje e mbyllur, në fund rezultoi një përmbysje e çmendur e Zorias, me dy gola në shtesë, 91 dhe 94. Gjithsesi, Seferi ndërkohë po tregon cilësitë e tij me 6 gola të shënuar në 15 ndeshje të luajtura.