Flamurtari mund 61-58 Tiranën, Partizani e Vllaznia bëjnë detyrën

Shfryn Mirza Alibegaj: Në Vlorë luhet 5 kundër 7

Kategoria e Parë e basketbollit të femrave ka zhvilluar takimet e javës së 13-të të kampionatit, ku vëmendjen më të madhe e ka pasur pa dyshim dueli i zhvilluar në Vlorë ndërmjet Flamurtarit dhe Tiranës. Një ndeshje që ka dhuruar emocione dhe rivalitet të lartë në parket nga fillimi e deri në sekondën e fundit, ndërsa nuk kanë munguar as polemikat për arbitrimin. Skuadra vlonjate fitoi në shifrat 6158, duke konsoliduar vendin e parë me 11 fitore në po kaq ndeshje të zhvilluara. Takimi ka nisur më mirë për Flamurtarin që kërkonte të krijonte shkëputje, për t’i mbyllur 10 minutat e para në shifrat 1813. Edhe çereku i dytë është disi më i mirë për vendëset, të cilat fitojnë 1916 dhe kryesojnë 37-29 në përfundim të pjesës së parë. Por pas pushimit është Tirana që luan më qartë. Vajzat e trajneres Mirza Alibegaj e fitojnë periodën e tretë dhe ngushtojnë në 48-44 pas 30 minutash. Perioda e fundit është nga më të bukurat, teksa herë Tirana dhe herë Flamurtari shkojnë në avantazh të ngushtë. Një minutë e gjysmë nga fundi Flamurtari merr kryesimin 61-58, ndërsa më pas askush nuk arrin ta dërgojë më topin në kosh. Kështu, shifrat nuk ndryshojnë dhe sfida mbyllet me festën e vajzave vlonjate. Për sa u përket paraqitjeve individuale, Benally me 17 pikë, Omerbasiç me 16, si dhe Ndongbwo me 6 pikë e 16 ribaunde bënë diferencën për bregdetaret. Për Tiranën më e mira ishte Palko, me 17 pikë, 8 ribaunde dhe 3 asiste. PRONONCIMET- Trajnerja vlonjate, Elona Hasanaj, pas fitores, për “Panorama Sport”, deklaroi: “Dua të falënderoj të gjithë ata që erdhën për të na mbështetur, pasi ishin një suport i jashtëzakonshëm. Ishte një ndeshje shumë e fortë dhe me rivalitet të lartë. Kjo ndeshje përfundimisht na vendosi të parët në klasifikim. Pas këtij takimi ‘play off’-in e kemi të sigurt, tri ndeshje në Vlorë dhe dy në Tiranë. Kemi gabuar shumë në mbrojtje dhe duhet të rikuperojmë. Para kemi Ligën Unike dhe gjysmëfinalet janë këtu në Vlorë dhe u bëj thirrje tifozëve të na mbësh

tesin. Kemi ekip shumë të mirë dhe synojmë, pse jo, që ta rrëmbejmë edhe Ligën Unike”, u shpreh Hasanaj. Ndërkohë, Mirza Alibegaj akuzoi gjykimin. Trajnerja e Tiranës tha se prej 20 vitesh kundër Flamurtarit, ato luajnë 5 kundër 7 në fushë. “Ishte një takim i fortë. Por në fushën e Flamurtarit që prej 20 vitesh, ne nuk luajmë 5 ndaj 5, por luajmë 5 me disa të tjerë nga mbrapa. Domethënë kur fillon analiza jonë, fillon që do të luajmë 5 me 7. Prandaj vazhdojmë punën tonë dhe zakonisht kemi dalë të humbur gjithmonë. Ato shtatë janë më të forta se pesë vajzat tona”, u shpreh Alibegaj.

NDESHJET E TJERA – Asnjë surprizë në dy ndeshjet e tjera, teksa Partizani fitoi bindshëm derbin kundër Studentit me rezultatin 52-79 (11-24, 7-18, 21-20, 13-17). Efikasitetin më të lartë për vajzat e trajneres Eliverta Bujari e kishte kapitenia Ornela Lalaj me 12 pikë, 13 ribaunde dhe 3 asiste. Për Studentin spikati Marina Pëllumbi me 17 pikë, 13 ribaunde dhe 4 asiste. Vllaznia mundi thellë Barletin 83-39 (21-14, 20-9, 27-3, 15-13) në Shkodër. Lojtarja e ndeshjes ishte Bernarda Rreshpja, protagoniste me tripletë dyshifrore: 20 pikë, 10 ribaunde dhe 11 asiste. ERMAL SIKA