Reali ngec dhe “adios” titullit, Barça shkon në +9

Katalanasit fitojnë me 10 veta dhe thellojnë diferencën

Madrilenët krijojnë, por përsëri nuk dinë të shënojnë

Reali i Madridit nuk ka mundur të çajë murin e Betisit, duke u ndalur në një barazim pa gola, që vetëm i ka bërë nder Barcelonës. Katalansit, që më herët gjatë ditës kishin mundur Valencian minimalisht 1-0, falënderojnë andaluzët dhe kthejnë diferencën prej 9 pikësh me Madridin. Nëse një javë më parë ishte Barcelona që i jepte një asist Realit me humbjen në Almeria, këtë herë ka qenë radha e tyre të përfitojnë nga ndalesa e të besuesve të Ançelotit.

REALI – Me rezultatin e Barcelonës të ditur, i gjithë presioni në mbrëmje ka qenë mbi Realin. Të thuash që Reali i Madridit nuk ia ka bërë hyzmetin në “Benito Vijamarin” do të ishte padrejtësi. Skuadra e Ançelotit ka tentuar me të gjitha mënyrat për të fituar kundër Betisit. Madje për një moment ka mundur ta çojë topin në fundin e rrjetës me Benzemanë, por një prekje me dorë nga Rydiger i ka hequr golin kampionëve të Spanjës në fuqi. Betisi nga ana e vet është mbrojtur mirë në pjesën e parë dhe pas golit të anuluar të Realit e ka balancuar takimin. Pjesa e dytë ka qenë edhe më e bukur. Fillimisht të dyja skuadrat kanë kërkuar golin, por me kalimin e minutave dominimi i Realit është bërë i frikshëm. Kampionët kanë hedhur gjithçka mbi vendësit, por pavarësisht përpjekjeve me Vinicius, Benzema, Rodrigo e Sebajos nuk kanë mundur të kalojnë Klaudio Bravon. Nëse javën e kaluar Madridi fitonte një pikë ndaj Barçës, mbrëmë ka lënë dy të tilla, e për rrjedhojë titulli largohet edhe më, këtë herë ndoshta në formë përfundimtare.

BARCELONA – Katalanasit i janë kthyer fitores në La Liga pas humbjes javën e kaluar kundër Almerias. Përsëri nuk ka qenë Barcelona më e mirë në fushë, por falë mbrojtjes së hekurt dhe golit të shënuar nga Rafinja në pjesën e parë, skuadra e Ksavit – i pezulluar në këtë takim, duke e ndjekur nga tribuna – ka marrë një fitore shumë të rëndësishme për llogaritë e titullit. Ndaj Valencias nuk ka qenë aspak e lehtë. Kjo dhe për faktin se katalanasit ia kanë ndërlikuar vetë jetën vetes. Pas golit të shënuar nga Rafinja për Barçën pasditja është dukur e qetë, ndonëse loja ka qenë larg pritshmërisë. Në pjesën e dytë katalanasit kanë shpërdoruar një penallti me

Ferran Torres. Këtu kanë nisur vuajtjet. Që janë shtuar më tej pas daljes me karton të kuq të Arauhos si lojtar i fundit. Me një lojtar më pak, Barcelona i është kthyer taktikës të ndjekur ndaj Realit në mesjavë në Kupë. Katalanasit janë kthyer tërësisht në mbrojtje me forca të shumta dhe pavarësisht përpjekjeve të Valencias kanë rezistuar deri në fund. Miqtë kanë protestuar për një penallti të mundshme të shkaktuar nga Kesi, por pa sukses.