NOTAT E SKUADRAVE
PARTIZANI 8 – Të humbësh në Shkodër 3-1 dhe pas pesë ditësh të fitosh derbin ndaj Tiranës 2-0, duhet të kesh forcë karakteri për të reaguar, ashtu siç i takon një klubi të madh që synon titullin kampion. Të kuqtë ishin thuajse perfektë në duelin me rivalin e përjetshëm. Kristian Mba, sulmuesi që u ble për të zëvendësuar Xhuliano Skukën, u zhbllokua pikërisht ndaj Tiranës, duke treguar cilësitë e një bomberi, që mbi të gjitha punon shumë për skuadrën edhe duke dhënë asiste. “Demat” kapën bardheblutë me pikë dhe tashmë kanë një bonus për vazhdimësinë, pasi në ndeshjet direkte kanë fituar dy herë ndaj tyre.
KUKËSI 8 – Përmbysje e madhe në Laç. Ishte një fitore që vlen sa për 6 pikë, pasi parakalon kundërshtarin në tabelë dhe lë poshtë vetes tri skuadra. Verilindorëve u duhet vazhdimësi tashmë dhe ndeshja me Bylisin në prag duket si një finale për t’u larguar nga zona e ftohtë.
EGNATIA 8 – Çfarë bingoje ka bërë klubi rrogozhinas me sulmuesin Rafael Duamena? I vetëm mundi Kastriotin, me një dopietë që tregoi se ganezi është një bomber klasi dhe tek Egnatia mund të ëndërrojnë Europën. Rrogozhinasit janë me meritë në vendin e tretë dhe po zhvillojnë tashmë një sezon që me siguri do të mbahet mend gjatë.
ERZENI 6 – Shijakasit nuk dorëzohen kurrë dhe këtë e tregojnë edhe në transfertën e Ballshit. Vuajnë shumë për të dalë me pikë, por ama nuk “vjedhin” asgjë, duke barazuar në fund me penalltinë e Kahrimanoviç, i cili është i pagabueshëm këtë kampionat nga pika e bardhë.
TEUTA 6 – Skuadra e Martinit krijoi aq shumë raste për të shënuar ndaj Vllaznisë, saqë në fund rezultati 1-1 duket si një humbje. Durrsakët kanë rritje të vazhdueshme dhe me këtë ecuri do të tentojnë Europën.
VLLAZNIA 5.5 – Luhatje të mëdha dhe për më tepër gabime në mbrojtje. Ekipi i Josës e ka shumë të vështirë të gjejë stabilitet në rezultate, pavarësisht se një pikë në Durrës nuk mund të bëhet dramë. Megjithatë, Vllaznia nuk përfitoi aq sa do të dëshironte nga rezultati i derbit.
BYLISI 5 – Nuk di të “vrasë” ndeshjen ndaj Erzenit me golin e dytë dhe në fund e pëson nga një 11-metërsh. Dy pikë të lëna për ballshiotët në shtëpi, që mund t’i vuajë shumë në luftën për mbijetesë.
KASTRIOTI 4 – Bën një lojë të mirë në Rrogozhinë, por këtë herë tradhtohet nga mbrojtja, që lë shumë hapësira dhe pëson katër gola. Qëndrimi në elitë bëhet një mision shumë i vështirë për krutanët.
TIRANA 4 – Bardheblutë ishin larg pritshmërive në të gjitha aspektet. Ndryshimi i skemës në derbi nuk rezultoi efikas dhe ekipi ishte shumë kaotik për mënyrën si e kërkoi rezultatin. Një humbje që djeg shumë në këtë moment...
LAÇI 4 – Faktori fushë nuk ekziston më në stadiumin ku edhe të merrje një pikë ishte luks deri pak vite më parë. Kurbinasit nuk njihen më dhe ndaj Kukësit pësuan humbjen e tretë radhazi në shtëpi, duke u futur në vorbullën e skuadrave që luftojnë për mbijetesë.