Hetimi, prokuroria vë në rresht presidentët e Barçës
Çështja për korrupsionin me gjyqtarët do të shkojë në gjykatë
Ndonjëri prej tyre mund të kalojë nga dëshmitar në të pandehur
Tashmë nuk ka asnjë mëdyshje se klubi i Barcelonës do të duhet të përballet me drejtësinë në Spanjë. Mediat në këtë vend kanë bërë me dije se Prokuroria e Përgjithshme në Spanjë ka vendosur të çelë zyrtarisht një hetim për klubin katalanas në lidhje me pagesën prej 6.2 milionë eurosh që ky klub ka bërë në llogari të ish-zëvendëspresidentit të Komitetit Teknik të Gjyqtarëve, Hoze Maria Enrikez Negreira. Këto pagesa janë bërë për periudhën 20012018. Prokuroria do të akuzojë Barcelonën për korrupsion në biznes në mënyrë të vazhdueshme dhe bashkë me klubin do të akuzojë dhe ish-presidentin e klubit, Josep Maria Bartomeu si dhe ish-shefin e gjyqtarëve Enrikez Negreira. Sipas gazetës spanjolle “El Mundo” çështja nuk është shumë e thjeshtë dhe prokuroria nuk ka ndër mend të tërhiqet nga vendimi i saj dhe ka vendosur të vendosë në rresht të gjithë ish-presidentët e Barcelonës, si dhe numrin një aktual të klubit, Joan Laporta. Joan Gaspart, Sandro Rosell, Josep Maria Bartomeu dhe Joan Laporta do të jenë të gjithë në gjykatë për të dëshmuar në lidhje me pagesat e bëra në adresë të kompanisë së drejtuar nga ish-shefi i gjyqtarëve. Në rast se ndonjëri prej tyre do të shpallet fajtor, dënimet e parashikuara variojnë nga gjashtë muaj deri në katër vjet burg së bashku me skualifikim të posaçëm dhe pagesën e gjobës trefishi i vlerës së përfitimit ose avantazhit të përfituar në mënyrë të paligjshme. Sipas gazetës spanjolle në fjalë, ndër katër ish-presidentët e Barcelonës, ai që rrezikon më shumë është Josep Maria Bartomeu. Fillimisht ai do të deklarojë në proces, por me vazhdimësinë e procesit nuk përjashtohet se ai apo ndonjë nga kolegët e tjerë të përfundojnë në bankën e të akuzuarve.
REAGIMI – Pas lajmeve të radhës të dala mbi skandalin e gjyqtarëve ka ardhur dhe re
agimi i ish-presidentit, Josep Maria Bartomeu. Duke folur për mediat ai ka nënvizuar se gjatë mandatit të tij nuk ka bërë asgjë të jashtëligjshme. “Kam vepruar konform rregullave dhe ligjeve, nuk ka ndërmarrë asnjë iniciativë të paligjshme”, ka thënë ai.