Shkëlqen Kumbulla, gol dhe festë me dedikim për...
Roma mposht Sociedadin 2-0, shkon e qetë në Spanjë
Marash Kumbulla u kthye në protagonist me Romën, në sfidën e 1/8-ave të Ligës së Europës përballë Real Sociedadit. Mbrojtësi i Kombëtares shqiptare u aktivizua në pjesën e dytë në vend të Jorentes dhe në minutën e 87-të të takimit gjeti golin me anë të një goditjeje me kokë, pas një krosimi të Dibalës. Menjëherë mbrojtësi, i cili po pret të bëhet baba për herë të parë, mori topin dhe e vendosi te barku, një festim i veçantë dhe me dedikim për bashkëshorten e tij dhe fëmijën që po pret. Ky ishte goli i dytë i Romës në këtë ndeshje, me Kumbullën që vulosi fitoren dhe i jep qetësi skuadrës së Murinjos për ndeshjen e kthimit në Spanjë. Pas golit të shënuar, Kumbulla dha një prononcim të shkurtër për mikrofonin e “Sky Sport”, teksa ndër të tjera deklaroi: “Goli ishte një emocion i papërshkrueshëm për mua. Gjithmonë ka qenë synimi im të shënoj një gol nën “Curva Sud”. E kam bëra nën “Curva Nord”, por kjo ka një shije tjetër, edhe sepse ishte e dobishme dhe shpresoj të jetë i dobishëm për ndeshjen e dytë. Jemi të pathyeshëm në mbrojtje falë të gjithë skuadrës, jo vetëm repartit difensiv, por edhe sulmuesve që na japin një dorë. Sigurisht edhe falë mbështetjes së tifozëve. Me këta tifozë është e pamundur të mos japësh gjithçka në fushë e lojës. Unë gjithmonë kam punuar shumë në stërvitje. Gjithmonë përpiqem të jap maksimumin dhe jam shumë i lumtur”, u shpreh Kumbulla.
LOJTARI I NDESHJES- Shqiptari u hodh në fushë në pjesën e dytë, teksa shënoi për Romën në minutën e 87-të, duke vulosur triumfin e kryeqytetasve. Në fund të duelit shqiptar u zgjodh lojtari më i vlerësuar i ndeshjes nga faqja e specializuar e statistikave “Sofa Score”. Kumbullës iu vendos nota 7.5, teksa regjistroi 16 nga 19 pasime të sakta, si dhe fitoi 6 nga 9 duelet me kundërshtarët.