Dibra: Na është shtrënguar “laku”
“Kjo fazë na gjen në siklet të madh, por hallin tonë e kanë 2/3 e ekipeve të Kategorisë së Parë”
BESËLIDHJA/ Kapiteni kërkon një sforco për të evituar dramën: Të fitojmë në Orikum
Drama e Besëlidhjes sa vjen edhe thel lohet. Sikur të mjaftoheshin me faktin që kanë ngelur pa një fushë stërvitore dhe shumë shpejt stadiumi do t’u shndërrohet në qendër rekreacioni, rrezikojnë që të bien edhe në Kategorinë e Dytë. Merkatoja e bërë në janar nuk e ka ndryshuar situatën. Janë ngujuar në fund të tabelës dhe zyrtarisht janë skuadra më e dobët e kësaj lige, me 15 pikë në 18 javë. Tifozët kanë 15 vite që presin ngjitjen në elitë, por ky objektiv do të mbetet një ëndërr edhe këtë herë. Arritja më e madhe do të ishte vetëm mbijetesa, qoftë edhe nëpërmjet “play out”-it. Kur kanë mbetur edhe 8 javë, gabimet i kanë të ndaluara. Finalen e parë e kanë në Orikum, atje ku i pret një rival direkt në këtë luftë. Kledi Dibra
mundohet që të “shkundë” ekipin para këtij 90minutëshi. Gjatë një deklarate të dhënë për “Panorama Sport” ai qartëson se vetëm fitorja do t’i mbante me shpresa. “Kampionati ka hyrë në fazën më të nxehtë, ku ekipet po i bëjnë llogaritë me laps në dorë... Fatkeqësisht ne gjendemi në fund të tabelës dhe kjo na ka shtrënguar ‘lakun’. Kanë mbetur edhe 24 pikë në lojë, që mund të na çojnë drejt mbijetesës. Por hallin tonë e kanë gati 2/ 3 e ekipeve në këtë ligë. Diferenca është e vogël, çka e vështirëson edhe më shumë situatën. Në këto rrethana nuk na mbetet gjë tjetër veç të mbledhim të gjitha forcat për ta fituar fillimisht transfertën ndaj Orikut. Jemi të dënuar. Kam besim se të gjithë futbollistët do t’i shkarkojnë që të gjitha energjitë, për ta rikthyer Besëlidhjen në ‘shina’”, përfundoi 30-vjeçari.