Fillesa dhe rikthimet e mëdha, “Djalli” shfaq oreks në Europë
Kanë kaluar njëmbëdhjetë vjet që kur Milani luajti për herë të fundit në një çerekfinale të Ligës së Kampionëve, por brenda një nate ajo kohë e gjatë u fshi sikur të mos kishte ndodhur asgjë. Arritja e Londrës i ktheu kuqezinjtë në majat e futbollit europian me një ekip dhe një trajner në të cilin shumë pak besonin, madje edhe brenda vetë klubit. Ja që, pas arritjes së titullit, vjen edhe ngjitja në katet e sipërme të futbollit kontinental. Po tani? Tani është e drejtë të ëndërrosh, duke ruajtur, megjithatë, të njëjtin shpirt luftarak të këtij “Djalli” të rilindur pas një janari të tmerrshëm në shumë aspekte. FILLESA - Gjithçka nisi nga mbrojtja. Pioli zgjidhi problemet e shfaqura në fillim të 2023-shit duke u fokusuar në prapavijë me tre lojtarë dhe më pas kthimin e Majk Menjasë për të plotësuar gjithçka. Prania e tij i jep siguri të gjithë departamentit edhe sepse është i aftë të bëjë pritje kampionësh: vendimtar si ai në kohën shtesë kundër Totenhemit. Me francezin në vendin e tij duket se ka rilindur edhe Tomori, teksa “zbulimi” i Çaut i ka dhënë freski dhe forcë një mbrojtjeje që duhej rimodeluar.
LEAO DHE SHORTI - Sigurisht, jo gjithçka është perfekte dhe ka ende një notë të stonuar që vjen nga Anglia. Bëhet fjalë për sulmin dhe veçanërisht Rafael Leaon. Portugezi vijon të jetë në momentin e tij të vështirë (e lidhur edhe me rinovimin e kontratës), nuk bëri as minimumin e detyrës. Pa galopimet e tij shkatërruese, Milani humbet shumë në fazën sulmuese si në gola ashtu edhe në pasime vendimtare. Megjithatë, fusha do të japë verdiktin e saj, por ndërkohë Milani është ndër tetë më të mirët e një Champions-i ku mungonte prej 11 vitesh. Është shumë herët për të parë shortin në Nion më 17 mars (e premte për supersticiozët) sepse ka ende katër ekipe të tjera për t’u promovuar. Nuk do të ketë kufizime dhe kështu mund të ketë një përplasje “vëllavrasëse” me Napolin dhe Interin nëse arrijnë të kapërcejnë përkatësisht Frankfurtin dhe Porton.