Plani i Nagelsmanit, si i eliminuan sheikët e PSG-SË
Sakrifica e bavarezëve u dha goditjen kritikave
Kualifikimi i Bajernit në Champions nxjerr në dritë shkaqet
Bajern Mynih do të kalonte një tjetër sprovë në rrugëtimin e vështirë përgjatë kuadrit të Ligës së Kampionëve. Edhe njëherë Nagelsman do të rezultonte shahist i vërtetë në ndërthurjen e elementëve të caktuar në kontingjentin përbërës, çka diktuan kalimin e fazës me eliminim direkt. Më poshtë po ju prezantojmë arsyet e triumfit nga gjermanët.
GJENIALITETI NË MBROJTJE-ZBARKIMI i Zhoao Kanselos në Mynih “hipnotizoi” këdo se 28-vjeçari luzitan do të shërbente si karta e duhur për të thyer çdo kundërshtar, marrë në konsideratë karakteristikat e ish”qytetarit”, si shpejtësia, krosimet fenomenale dhe kombinimet e shkëlqyera në zona të ngushta. Por ky detaj nuk u zbatua nga Nagelsman ndaj yjeve të Parisit, ndonëse Zhoao ishte i disponueshëm, Josip Stanisiçit iu besua krahu i djathtë. Argumenti i Julianit qëndroi në arsyetimin se kroati ka tipare më të theksuara defensive sesa Kanselo. Megjithatë, kjo është vetëm pjesa e parë e skenarit të 35-vjeçarit. Ish-tekniku i Lajpcigut mendoi që kontrollin e sferës t’ua linte miqve, e për pasojë do të jepte ide më të qartë se çfarë filozofie do të lunte kundërshtari. Është fakt se arma më e fortë e PSG-SË janë daljet e shpejta, aty ku shfrytëzimi i aftësive të Mbapesë mbetet themelor. Pikërisht kjo strategji bëri që parisienët të mos e menaxhonin dot sferën në mënyrë të rrjedhshme, e përkthyer me dy gola të pësuar nga gabimet e mesfushës dhe mbrojtjes. Po ashtu krijimi i një kordoni të hekurt në repartin difensiv me Stanisiç-upamekanode Ligt-dejvis i ktheu yjet e sulmit mik në të zakonshëm, thuajse të përhumbur në ato pak “thërrime” rastesh në kuadratin e Zomerit.
RIKTHIMI I IDENTITETIT-TRAZIRAT ishin kthyer në kryefjalë javët e fundit në Mynih, duke nisur me rebelizmin e dyshes Gnabri-sane e duke evoluar me pakënaqësitë
e Kanselos. Gjithsesi, panorama në fjalë nuk do të kishte vend në paraqitjen e fundit të kampionëve të Bundesligës ndaj Mbapesë me shokë. Çdo lojtar i Bajernit dha kontribut të pashoq për aq kohë sa ishte aktiv, statistika e kilometrave të përshkuara
u vuri kapak diskutimeve se rrethi i “dembelëve” po infektonte pjesën tjetër të ekipit (122 km të kryera). Shembulli më i mirë ishte pa diskutim Gnabri, autor i golit final, pavarësisht se erdhi nga pankina apo Kanselo në pozitën e shërbyesit. Termi “Mia san
Mia” duket se ka gjetur rrënjë të thella në metodat e Julianit, jo vetëm në planin taktik, por edhe atë motivues e nxitës, me qëllim prezantimin e gjithë arsenalit të futbollistëve në fushën e blertë, aq më pak në një moment kaq delikat mbi fatet e sezonit.