Kukësi në “ashensor”, zhyt Bylisin
Supergoli me thembër i Atdhe Rashitit dhe perla e kapitenit Gjelbrim Taipi vulosën triumfin
Skuadra e Hallaçit merr 3 pikë të arta ndaj ballshiotëve, i afrohet zonës europiane
Kukësi i largohet për fundimisht zonës së ftohtë pas fitores së pastër 2-0 në duelin direkt me Bylisin në “Kukës Arena”. Një përballje e rivalizuar që u zgjidh vetëm në pjesën e dytë, me golat e Atdhe Rashitit dhe kapitenit Gjelbrim Taipi, të cilët e ngjisin skuadrën në kuotën e 34 pikëve. Tashmë Kukësi është vetëm 6 pikë më pak nga vendi i parë, çka bën që të nisë të ëndërrojë për të bërë përmbysjen e madhe për Europën. Nga ana tjetër, përpos dëshirës dhe përpjekjeve, Bylisi del sërish i mundur nga kjo fushë dhe sot më shumë se kurrë është pranë rikthimit në të Parën, edhe pse mbeten edhe 11 javë kampionat.
PJESA E PARË
Ekipet e nisin me vrull ndeshjen që në minutat e para, duke vizituar portat respektive. Fillimisht është Zguro për miqtë dhe më pas Shqiprim Taipi që japin shkëndijat e para. Mirëpo, kjo nisje dha thjesht një iluzion të gabuar, pasi me kalimin e minutave ekipet hasin vështirësi të përfundojnë një aksion për shkak të gabimeve të shumta. Bylisi duket më kërkues, me Kukësin që mundohet të qetësojë lojën dhe të dalë gradualisht në sulm. Gjithsesi, vendësit kanë një mundësi të mirë me Rashitin që jep një top për Domin pas gabimit të Damçevskit, por në momentin e fundit është Teqja ai që me daljen e tij bën shpëtimtarin. Tafas bën të njëjtën gjë në krahun tjetër, me Trumçin që përfiton nga një top i Zguros në zonë, por edhe pse godet keq, për pak e ndal në rrjetë. Përpjekjet nuk mungojnë nga të dyja kampet, por s’ka finalizim dhe pjesa e parë mbyllet me rrjeta të paprekura.
PJESA E DYTË
E dyta nis me të njëjtët titullarë, me Hallaçin dhe Shensoin që nuk preferojnë të kryejnë zëvendësime. Sfida ka të njëjtin rritëm, ashtu si në pjesën e parë, me Kukësin që mundohet të kontrollojë lojën dhe shfaqet rrezikshëm me anë të harkimeve në zonë, por nuk shfrytëzohen si duhet. Bylisi mundohet të mbrohet dhe të gjejë të çara në prapavijën vendëse, por rastet e rrezikshme mungojnë. Kukësi rrit dozën e presionit dhe goli vjen në minutën 65-të, pas një skeme nga goditja e këndit. Ndreca provon goditjen potente nga jashtë zone, aty ku përfiton Rashiti i vetëm pranë portës, që me thembër nxjerr jashtë loje Teqjan dhe e ndal në rrjetë. Festë në kampin kuksian dhe ekipi është më i qetë për të administruar lojën. Katër minuta më pas kanë mundësinë e artë me Hasajn të mbyllin ndeshjen, por gabon në pasimin përballë
portierit, duke sfumuar mundësinë. Gjithsesi, sfidën do ta mbyllë kapiteni Taipi, i cili nga goditja e dënimit e dërgon sferën në rrjetë, duke i dhuruar skuadrës së tij tri pikë të arta, që i jep një shkelm krizës dhe zhyt ballshiotët thellë në fundin e renditjes.