Vlahoviç, 5 arsye që e çojnë te Bajerni
Mosha e Çupo-moting dhe skenarët e ndërlikuar te Juvja e shtyjnë drejt “Allianz Arena”-s
Gjetja e “pykës” ideale mbetet ende pronë pa zot te gjigantët e Mynihut
Zaptimi i numrit 9 në “Allianz Arena” ende nuk e ka gjetur “pronarin” e vërtetë pas largimit të Robert Levandovskit drejt Barcelonës. Edhe pse Erik Maksim Çupomoting ka marrë trajtën e improvizuesit në Mynih, sërish nuk bind për garantimin e suksesit në periudhën afatgjatë. Herri Kejn është lakmuar shpesh si personazhi i duhur për të zhdukur hijen e bomberit polak në radhët e rekordmenëve gjermanë, megjithatë qëndrimi i hekurt i drejtuesve të “Gjelave” londinezë e ka lënë pezull si operacion. Së fundmi Dushan Vlahoviç është vënë në shënjestrën e drejtuesve bavarezë. Më poshtë po ju prezantojmë arsyet se përse kjo lëvizje mund të ketë fund të lumtur.
1. MOSHA E ÇUPOMOTING-ERIK erdhi pa shumë pretendime në kampin e fituesve të Bundesligës, por surpriza e hidhur në merkaton e verës, e përkthyer me zhvendosjen e Levandovskit, bëri që Nagelsman së bashku me bordin të mos gjenin dot alternativën e denjë, zëvendësimin e një prej bomberëve më të mirë në planet në spektrin e futbollit. Gjithsesi, kamerunasi ia ka dalë të kthehet në lojtar përcaktues, 17 gola në 26 prezencat e bashkëngjitura me 4 asiste. Treguesit e mësipërm u vlerësuan edhe nga drejtuesit e rekordmenëve në servirjen e kontratës së re, e cila do të zgjasë deri në fundin e sezonit pasardhës. Skema në fjalë bën të kuptosh se trinomi Nagelsman-brazo-khan nuk e kanë në plan afatgjatë bashkëpunimin, me arsyetimin e drejtë të moshës, 33 vjeç.
2. PAMUNDËSIA E Kejnit-drejtori sportiv dhe shefi i Bajernit e diktuan që në momentet e para pas largimit të Levës se Herri Kejn ishte i vetmi personazh i duhur në ngushtimin e hendekut në majë të sulmit. Është fakt se karakteristikat e 29vjeçarit anglez janë të ngjashme me ato të polakut, pykë e mirëfilltë. Megjithatë, qëndrimi stok i presidentit të Tohenhemit, Levi, u ka dhënë goditje shpresave. Edhe pse
“Gjelat” e Londrës nuk po përjetojnë formë të mirë, çka mund të pasohet me ndryshime, sërish duket shumë e vështirë që Herri të zhvendoset nga Ishulli, aty ku dy Mançesterët qëndrojë në krye. Siti i druhet ndonjë skenari lamtumire të parakohshme mbi Haland, ndërsa “Djajtë” kanë të njëjtin problem si bavarezët në pozitën e 9-ës.
3. MUNGESA NË CHAMPIONS-VENDIMI i përkohshëm për t’i hequr 15 pikë Juventusit nga renditja në Serinë A ka bërë që zona e Ligës së Kampionëve të shikohet me dylbi nga bardhezinjtë. Aktualisht, ekipi i Alegrit ndodhet 12 pikë pas Romës dhe Milanit, të cilat nënkuptojnë distancën me Champions-in. Në rast të mosarritjes së këtij objektivi, Dushan me shumë gjasa do ta mendonte seriozisht “divorcin” me rekordmenët e Italisë. 13 javët në vijim do të japim rezymenë finale mbi dilemën e “top-4” në Serinë A, jo vetëm për Juven në përgjithësi, por edhe rreth pretendimeve të bomberit serb.
4. SKEMAT E ALEGRITTEKNIKU i Juventusit ka përdorur shpesh skemën me 3 sulmues, ku roli i protagonistit u ka kaluar krahëve në fazën ofensive, e përkthyer me dyshen Kieza-di Maria, ndërsa ballkanasi si “statujë” e vetmuar në qendër. Termi i mësipërm qëndron koherent me filozofinë e Maksit, i cili nuk dëshiron që lojën ta zhvendosë vetëm në individë të caktuar, por në shpërndarjen e saj. Një strategji e tillë i limiton topat drejt qendrës dhe shanset e Vlahoviçit si futbollist deciziv.
5. 80 MILIONË Euro-juventusi realizoi arritje në merkaton e dimrit gjatë vitit 2022, me autor Dushan Vlahoviçin. 23-vjeçari do të lëvizte në aksin Fiorentinatorino për vlerën e 80 milionë eurove. Shifra në fjalë nuk e ka prezantuar justifikimin në fushën e blertë, e cila mund të ndikojë në merkaton e ardhshme të ndonjë oferte të ngjashme. Situata aktuale e Juves nuk është aspak e mirë në shumë drejtime dhe aspekti financiar nuk mund t’i shpëtojë, marrë në konsideratë metodat e Alegrit. Trajneri 55-vjeçar preferon lojtarë me tipare altruiste dhe një çek me të njëjtën kuotë të adresuar nga Bajerni, që do t’i ndizte dritën e gjelbër operacionit, pasi me të ardhurat e përftuara, Maks do të kishte mundësi të siguronte disa futbollistë me repertorë të ndryshëm.