Josa: Bëmë çfarë mundëm, dënimi i Latifit vazhdon
“Për Liridonin vendos klubi, skuadra nuk është një lojtar”
Trajneri i Vllaznisë: Provuam të gjitha mënyrat, Partizani u ngjesh
Mirel Josa e ka cilë suar barazimin e së shtunës ndaj Partizanit si një sfidë, ku skuadra bëri maksimumin për të fituar, duke lënë të kuptohet se nuk ka shumë “pishmane”. Pas ndeshjes, ai foli edhe për dëmtimin e rëndë të Malës, si dhe për situatën e Latifit të pezulluar. Josa u shpreh se skuadra duhet të ishte më e shpejtë në kombinime, teksa pranon se ndryshoi disa herë vendosjen për ta kapur Partizanin në befasi.
DËMTIMI
“Mala ka shkuar në spital, ka bërë grafi. Sipas përgjigjeve që na kanë dhënë doktorët, ka një thyerje me zhvendosje në klavikulë. Të shohim se si do ta trajtojnë mjekët problemin e vendosjes, me operacion apo vetëm me lidhje”.
BARAZIMI
“Jo se jemi të kënaqur nga këto rezultate ose nga ndeshja e sotme, por ne bëmë çfarë është e mundur në të gjitha mënyrat, sidomos në pjesën e dytë. Për ta vënë në presion më shumë skuadrën e Partizanit, ndryshuam edhe vendosjen. Si në fillim, edhe më vonë me aktivizimin e Kainas. Duhej të luanim më shpejt me krahët dhe të ishim më cilësorë në shërbim”.
LOJA
“Duhej që shërbimi nga krahët të ishte më i mirë apo loja të zhvendosej më shpejt nga një krah në tjetrin që të krijonim diferencën. Në disa momente u bë, por të mos harrojmë
se luan edhe kundërshtari futboll, jo vetëm ne”. KUNDËRSHTARI “Partizani u ngjesh në mesfushë, u mundua të na kapte me Da Silva dhe Mbanë. Ne bëmë disa gabime, edhe pas rezultatit 1-1. Goli i anuluar erdhi nga një gabim i yni, sepse kishim topin në këmbë. Dy qendrat e mesfushës, Alivoda dhe Boshnjaku duhej të ishin më të gatshëm për ndryshimin e lojës apo marrjen e topit nga qendërmbrojtësit dhe nuk kishim pse luanim me mbrojtësit dhe portierin, sepse nuk ke pse rrezikon në këto momente”. PEZULLIMI I LATIFIT “Këtu ka marrë një vendim klubi, është përkrahur edhe nga ana ime. Do të shohim ecurinë, sepse e kam thënë që skuadrën nuk e bën një lojtar”, tha Josa për “Oversport” pas përfundimit të ndeshjes.