Predhë e Saliajt, Tërbuni rrëzon nga “froni” Flamurtarin
Tension i madh në Pukë, vlonjatët nuk rezistojnë dot në “majë”
Flamurtari bie në Pukë. Vlonjatët nuk rezistojnë dot më shumë se një javë në “majë”. Humbën minimalisht përballë Tërbunit dhe tani e shohin veten të dytët, me dy pikë më pak se Skënderbeu kryesues. Pas 6 javësh pa fitore, u kthyen edhe pukjanët. Një trepikësh që bën vërtetë punë. Iu larguan zonës së kuqe, por jo rrezikut. Ishte Donald Saliaj që bëri heroin në të 71-ën, me një predhë nga distanca. Nuk ishte fort e qetë ajo ndeshje në “Ismail Xhemali”. Ndërhyrje të ashpra, vonesa në lojë dhe shumë, po shumë, nerva. E megjithatë, kjo gjë nuk ua prishi festën 700 tifozëve në stadium.
PJESA E PARË - Tërbuni tregon kush është “zot” në fushë pas vetëm 4 minutash. Mezini gjuan nga një distancë prej 20 metrash, por topi ndalet nga shtylla. Ky episod sikur i jep zemër dhe dukshëm janë më kërkues. Radhazi janë Tafili, Saliaj, Mezini dhe Hysa që kërkojnë golin, por Kuka bën “bllokadë”. Në të 37-ën është Metani që shërben për Xhebrahimin, por shënjestra është totalisht e gabuar. Të vetmin rast ekipi mik e ka pasur në minutën e 30-të me autor Oliveirën, që provon nga kufijtë e zonës, por Vata bën
mrekullinë. Pjesa e parë mbyllet me 4 goditje këndi të pukjanëve, që nuk sollën asgjë. PJESA E DYTË – Flamurtari kthehet më kërkues në pjesën e dytë, ndonëse nuk çan dot përpara. Në të 50-ën dhe 57ën janë brazilianët Oliveira dhe Fernando që rrezikojnë
vërtetë, por mbrojtja pukjane ishte në ditën e saj më të mirë. Ashtu si në qetësi, Tërbuni fiton terren dhe në të 71-ën gjen golin e shumëpritur. Janë Rezi e Filipi që “gatuajnë” një mundësi fantastike për Saliajn. I ndodhur gati 18 metra larg portës, nuk heziton. Gjuan me
të majtën një predhë dhe u jep avantazhin vendësve. Flamurtari mundohet me çdo formë që të gjejë barazimin, por e ka të pamundur. Pukjanët ditën jo vetëm që të mbronin pikët e plota, por edhe të sulmonin. E megjithatë, goli i dytë nuk erdhi as në 6 minuta shtesë. DITMIR PEMA