Vora blindon kreun mes polemikave

Sopoti e mbyll me 9 lojtarë dhe akuzon gjykimin: Turp, kishin ardhur me qëllime të qarta

Kryendeshja fitohet nga ekipi i Mërgjyshit, vendosin golat e Sefës dhe Prengajt

Vora thyen Sopotin 20 në kryendeshjen e javës për Grupin A të Kategorisë së Dytë dhe shkëputet në krye me katër pikë më tepër se librazhdasit. Ka qenë një ndeshje me shumë tension dhe që u zgjidh në pjesën e dytë, kur golat e Sefës në minutën e 67-të dhe Prengajt në frymën e fundit, bënë diferencën për skuadrën e Artan Mërgjyshit. Lojtarët e Sopotit kanë kundërshtuar disa herë vendimet e arbitrit kryesor, Daniel Vrapi. Miqtë e mbyllën takimin me 9 lojtarë, pasi me kartonë të kuq u ndëshkuan Seferi dhe Jugu në minutat 72 dhe 79. Arbitri nxori nga xhepi plot 11 kartonë të verdhë, ku më të dëmtuarit ishin librazhdasit, të cilët gjithsesi nuk u dorëzuan deri në fund, duke vënë në vështirësi Vorën, edhe pse në disavantazh numerik. NDESHJA

Loja nisi e bukur dhe në një atmosferë të veçantë në stadiumin e ri të Vorës, ku interesimi nga tifozët ka qenë më i madh se në ndeshjet e tjera. Fillimisht janë librazhdasit që kërkojnë golin, por mbrojtja vorake është në një ditë të mirë dhe lë pak hapësira. Vora është e kujdesshme dhe rastin më të pastër e ka pas një kombinimi të Avdiut me Prengajn, teksa ky i fundit godet fort dhe portieri Miraka pret shkëlqyeshëm. Pjesa e parë mbyllet me

rrjeta të paprekura, ndërsa në të dytën, vorakët janë më konkretë. Pas një presioni në rritje, ata do të zhbllokojnë shifrat me anë të Sefës. Ky i

fundit godet nga jashtë zonës dhe shënon golin e parë. Pas pesë minutash nga ky avantazh, Erando Seferi për miqtë lë fushën, pasi merr kartonin e dytë të verdhë, duke e lënë skuadrën me 10 lojtarë. Por, 7 minuta më vonë rëndohet edhe më tepër situata, pikërisht atëherë kur Sopoti po kërkonte barazimin me ngulm. Ndëshkohet me kartonin e dytë të kuq edhe mbrojtësi Shaqir Jugu. Kështu, në 11 minutat e fundit skuadra mike do të luante me 9 lojtarë. Pikërisht atëherë kur pritej fundi, është sulmuesi Fatmir Prengaj që vulos fitoren 2-0 të Vorës.

REAGIMI

Mbrojtësi 23-vjeçar i Sopotit, Shaqir Jugu, u ndëshkua me të kuq në minutën e 79-të, por në një bisedë pas ndeshjes për “Panorama Sport” akuzoi gjykimin, duke e cilësuar skandaloz në dëm të skuadrës librazhdase. “Turp dhe vetëm turp. Gjyqtarët kishin ardhur me qëllime të qarta. Në çdo ndërhyrje kishte karton të verdhë për ne. Nuk na lanë të marrim frymë! Megjithatë, e mbyllëm pjesën e parë 0-0. Në pjesën e dytë, ata ishin me mision për të ndihmuar Vorën. Sa e panë që ekipi vorak nuk i afrohej dot portës sonë, filluan që në ndërhyrjet e para të nxirrnin direkt kartonin e kuq, që e kishin bërë gati ndoshta që në pushim. Arbitrat luanin me nervat tona, qeshnin me njëritjetrin në kufje. Ky është një skandal, sepse po tallen me djersën tonë të derdhur gjatë një viti. Është gjynah”, ka thënë i dëshpëruar i riu.