Spektakël bardheblu në Farkë, Tirana fiton Kupën
Kryeqytetasit u kthehen në “makth” shijakasve nëpër finale
VOLEJ MESHKUJ/ Skuadra e Sakos thyen Erzenin me rezultatin 3-1
Tirana ka regjistruar një tjetër sukses të rëndësishëm në volejbollin e meshkujve. Bardheblutë janë shpallur fitues të Kupës së Shqipërisë 20222023, teksa kanë mundur Erzenin në finale me rezultatin 3-1 të shtunën në Farkë. Ledion Martiro dhe argjentinasi Nahuel Lapera ishin në një ditë të shkëlqyer, duke udhëhequr Tiranën drejt trofeut. Ky është triumfi i nëntë në këtë kompeticion për kryeqytetasit dhe ashtu sikurse një vit më parë sërish vjen përballë shijakasve. Kështu Tirana konfirmohet si “mace e zezë” në finale për Erzenin, kur pas një serie triumfesh në edicionin e kaluar dhe fitores në Kupën e FSHV-SË në shtator, skuadra e Arben Sakos merr një tjetër sukses ndaj shijakasve.
NDESHJA – Në një atmosferë elektrizuese, me dy tifozeritë që kishin mbushur sallën, skuadrat zbritën në parket për betejën e radhës sportive me njëra-tjetrën. Këtë herë në mes ishte trofeu i Kupës së Shqipërisë. Sfida startoi me pikën e parë nga braziliani Soares për Erzenin, të cilin iu kundërpërgjigj Baruti
për bardheblutë. Seti i parë vijoi me rivalitet, duke shënuar disa barazime deri në 1616, por më pas argjentinasi Lapera çon në delir Tiranën me 5 pikë radhazi, ndërsa seti i parë mbyllet 25-18 për kryeqytetasit. Në setin e dytë Erzeni kërkon reagimin, ndërsa
loja vijon me rivalitet të lartë, duke shkuar me pikë shtesë, aty ku skuadra e Partit Uruçit fiton 26-28, duke vendosur baraspeshën 1-1 me sete. Në setin e tretë Tirana kishte një epërsi të lehtë thuajse gjatë të gjithë kohës, për të fituar 25-21. Edhe seti i katërt
nuk kishte shumë histori, teksa Ledion Martiro bëhet protagonist i “match point”-it, duke vulosur setin 25-19 dhe të gjithë takimin 3-1, për të shpërthyer festën e shfrenuar bardheblu në sallë. Një sukses i merituar për Tiranën, që u jep bardhebluve më shumë moral dhe besim edhe për garën në kampionat. Ndërsa në kampin shijakas, të besuarit e trajnerit Parit Uruçi nuk mundën që të përsërisnin triumfin e dy javëve më parë në Ligën Gjergj Kastrioti dhe tashmë të gjitha energjitë do të shkojnë në kampionat për të kërkuar fitimin e titullit.